പാലക്കാട്: സംസ്ഥാനത്ത് വേനല്‍ക്കാല താപനില ഏറ്റവും ഉയര്‍ന്ന് 40 ഡിഗ്രിയിലേക്ക്. റെക്കോര്‍ഡ് താപനിലയാണ് ഇന്ന് പാലക്കാട് രേഖപ്പെടുത്തിയത്. പാലക്കാട് ഇന്ന് താപനില 40ഡിഗ്രി സെല്‍ഷ്യസിലേക്കെത്തി.
അതേസമയം, ഏഴ് മണിക്ക് ശേഷം പുറത്തിറക്കിയ അറിയിപ്പ് പ്രകാരം ആറ് ജില്ലകളില്‍ ഇന്ന് രാത്രി മഴയ്ക്ക് സാധ്യതയുണ്ടെന്ന് കാലാവസ്ഥ പ്രവചനം. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം ജില്ലകളില്‍ ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ മഴക്ക് സാധ്യതയുണ്ടെന്നാണ് അറിയിപ്പ്. മഴയ്‌ക്കൊപ്പ് 40 കിലോമീറ്റര്‍ വരെ വേഗതയില്‍ വീശിയേക്കാവുന്ന ശക്തമായ കാറ്റിനും സാധ്യതയുണ്ട്.
എന്നാല്‍, സംസ്ഥാനത്ത് പലയിടങ്ങളിലും വേനല്‍ മഴ പെയ്‌തെങ്കിലും താപനിലയില്‍ കാര്യമായ വ്യത്യാസം അനുഭവപ്പെടുന്നില്ല. ഇന്നലെ ഇടുക്കി, കോട്ടയം, ആലപ്പുഴ, പത്തനംതിട്ട, കൊല്ലം , തിരുവനന്തപുരം ജില്ലകളില്‍ വേനല്‍ മഴ ലഭിച്ചു. ഏറ്റവും കൂടുതല്‍ മഴ ലഭിച്ചത് ആലപ്പുഴയിലായിരുന്നു. കോന്നി, കാഞ്ഞിരപ്പള്ളി, തിരുവനന്തപുരം വിമാനത്താവളം എന്നിവിടങ്ങളില്‍ 20 മിമീ ല്‍ അധികം മഴ ലഭിച്ചു.
നാളെ തൃശൂര്‍, എറണാകുളം, കോട്ടയം, ആലപ്പുഴ, കൊല്ലം, തിരുവനന്തപുരം ജില്ലകളിലും കാലാവസ്ഥാ വകുപ്പ് വേനല്‍മഴ സാധ്യത പ്രവചിച്ചിട്ടുണ്ട്.
weather update
