ന്യൂയോർക്ക്: അമേരിക്കയിലെ ഏറ്റവും വലിയ ഓണഘോഷങ്ങളിൽ ഒന്നായ വെസ്റ്റ് ചെസ്റ്റര് മലയാളി അസോസിയേഷന്റെ ഈ വർഷത്തെ ഓണഘോഷം സെപ്റ്റംബർ 21 ന് ശനിയാഴ്ച രാവിലെ 11 മണി മുതല് 6.00 മണി വരെ പോർചെസ്റ്റർ ഹൈസ്കൂൾ ഓഡിറ്റോറിയത്തിൽ (1 Tamarack Road , Port Chester, NY 10573) വച്ച് വിപുലമായ പരിപാടികളോടെ നടത്തപ്പെടും. ഇതിന്റെ ഫ്ലയർ പ്രകാശനം ചെയ്തു.
അസോസിയേഷന്റെ 50- ആം ഓണഘോഷമാണ് ഈ വർഷം. അൻപതു ഓണം കണ്ട അപൂർവ സംഘടനകളിൽ ഒന്നാണ് വെസ്റ്റ് ചെസ്റ്റർ മലയാളി അസോസിയേഷൻ. അൻപതാം വർഷ ആഘോഷങ്ങളുടെ ഭാഗമായി ഈ വർഷത്തെ ഓണാഘോഷം എൻട്രൻസ് ഫീ ഇല്ലാതെ നടത്തുവാനാണ് അസോസിയേഷൻ കമ്മിറ്റിയുടെ തീരുമാനം.
ഓണക്കാലത്തിന്റെ എല്ലാ അനുഭൂതിയും ഉണര്ത്തുന്ന പരിപാടികളാണ് ക്രമീകരിച്ചിരിക്കുന്നത്. ചെണ്ടമേളവും ശിങ്കാരി മേളത്തോടും കൂടി താലപ്പൊലിയുമായി മാവേലി തമ്പുരാനെ വരവേല്ക്കുന്നതോടെ തുടങ്ങുന്ന പരിപാടികളില് അത്തപ്പൂക്കളവും, തിരുവാതിരകളിയും, പുലിക്കളിയും തുടങ്ങി കേരളത്തിലെ ഓണത്തിന്റെ എല്ലാ ആഘോഷങ്ങളോടും കേരള തനിമയോടും കൂടിയാണ് വെസ്റ്ചെസ്റ്റർ മലയാളി അസോസിയേഷൻ ഓണം കൊണ്ടാടുക.
വെസ്റ്ചെസ്റ്ററിന്റെ ഓണം ന്യൂയോർക്ക് മലയാളികളുടെ ഒത്തുചേരൽ കൂടിയാണ്. ഓണഘോഷം വിജയപ്രദമാക്കുവാന് വെസ്റ്റ്ചെസ്റ്റര് , ന്യൂയോർക്ക് നിവാസികളായ എല്ലാ മലയാളി സഹോദരങ്ങളുടെയുംസഹായ സഹകരണങ്ങള് അഭ്യർഥിക്കുന്നതായി പ്രസിഡന്റ് വർഗീസ് എം കുര്യൻ (ബോബൻ), സെക്രട്ടറി ഷോളി കുമ്പിളിവേലി, ട്രഷറര് ചാക്കോ പി ജോർജ് (അനി), വൈസ് പ്രസിഡന്റ് ജോയി ഇട്ടൻ, ജോ. സെക്രട്ടറി നിരീഷ് ഉമ്മൻ, ജോയിന്റ് ട്രഷർ അലക്സാണ്ടർ വർഗീസ്, ട്രസ്റ്റി ബോര്ഡ് ചെയര് രാജ് തോമസ്, കോർഡിനേറ്റേഴ്സ് ആയ ടെറൻസൺ തോമസ്, ശ്രീകുമാർ ഉണ്ണിത്താൻ എന്നിവര് അറിയിച്ചു.
