2022 ജനുവരിയിൽ കാനഡയിൽ നിന്ന് യുഎസിലേക്ക് കടക്കാൻ ശ്രമിച്ച ഒരു കുടുംബത്തിലെ നാല് ഇന്ത്യക്കാർ തണുത്തു മരവിച്ചു മരിച്ച മനുഷ്യക്കടത്ത് കേസുമായി ബന്ധപ്പെട്ട് ഒരു ഇന്ത്യക്കാരൻ യുഎസിൽ പിടിയിലായതായി കനേഡിയൻ ബ്രോഡ്കാസ്റ്റിംഗ് കോർപ്പറേഷൻ (സിബിസി) ന്യൂസ് റിപ്പോർട്ട് ചെയ്തു.
‘ഡേർട്ടി ഹാരി’, ‘പരം സിംഗ്’, ‘ഹരേഷ് രമേഷ്‌ലാൽ പട്ടേൽ’ എന്നീ പേരുകളിൽ അറിയപ്പെടുന്ന ഹർഷ്കുമാർ പട്ടേലിനെ കഴിഞ്ഞയാഴ്‌ച ചിക്കാഗോ വിമാനത്താവളത്തിൽ വെച്ചാണ് അറസ്റ്റ് ചെയ്തത്. മനുഷ്യക്കടത്ത്, ഗൂഢാലോചന തുടങ്ങിയ കുറ്റങ്ങൾ ചുമത്തിയാണ് അറസ്റ്റ്.
2022 ജനുവരി 19നാണ് ഗുജറാത്തിലെ ഗാന്ധിനഗര്‍ സ്വദേശികളായ ജഗദീഷ് ബൽദേവ്ഭായ് പട്ടേൽ, ഭാര്യ വൈശാലിബെൻ ജഗദീഷ്കുമാർ പട്ടേൽ, മക്കളായ വിഹാംഗി ജഗദീഷ്കുമാർ, ധാർമിക് ജഗദീഷ്കുമാർ എന്നിവരെ യുഎസ്-കാനഡ അതിര്‍ത്തിയില്‍ മരിച്ച നിലയിൽ കണ്ടെത്തിയത്. കഠിനമായ ശൈത്യത്തെ തുടര്‍ന്ന് ഇവര്‍ തണുത്തു മരവിച്ചാണ് മരിച്ചതെന്ന് പോസ്റ്റ്മോർട്ടം റിപ്പോർട്ടിൽ പറയുന്നു. ഇതിനു പിന്നാലെ അറസ്റ്റിലായ ഫ്ലോറിഡ സ്വദേശിയായ കള്ളക്കടത്തുകാരൻ സ്റ്റീവ് ഷാൻഡിനെ ഹർഷ്കുമാർ പട്ടേൽ റിക്രൂട്ട് ചെയ്തതാണെന്ന് കോടതി രേഖകൾ പറയുന്നു.
ഇന്ത്യൻ പൗരന്മാർക്ക് അമേരിക്കയിലേക്കുള്ള അനധികൃത പ്രവേശനം സുഗമമാക്കുന്ന സംഘടിത മനുഷ്യക്കടത്ത് സംഘത്തിൻ്റെ ഭാഗമായിരുന്നു പട്ടേലെന്ന് പോലീസ് പരാതിയിൽ പറയുന്നു.
ഹർഷ്കുമാർ പട്ടേലും ഷാൻഡും തമ്മിലുള്ള ആശയവിനിമയത്തിൻ്റെ വിശദാംശങ്ങളും പോലീസ് പരാതിയിൽ നൽകുന്നു. “വാടക കാറുകൾ, ഹോട്ടലുകൾ, ഷാൻഡിലേക്കുള്ള പേയ്‌മെൻ്റുകൾ എന്നിവയ്ക്കുള്ള ക്രമീകരണങ്ങളെ കുറിച്ച്” അവർ സംസാരിച്ചു.
2021 ഡിസംബറിനും 2022 ജനുവരിക്കുമിടയിൽ അഞ്ച് തവണയാണ് സ്റ്റീവ് ഷാൻഡ് അനധികൃതമായി ആളുകളെ എത്തിച്ചത്. ജനുവരി 19നാണ് പിടിയിലാകുന്നത്. ജഗദീഷ് പട്ടേലും കുടുബവും 12നാണ് കാനഡയിലെ ടൊറന്റോയിലെത്തിയത്. ടൊറന്റോയിൽ നിന്ന്, കുടുംബം മാനിറ്റോബയിലേക്കും തുടർന്ന് എമേഴ്‌സണിലേക്കും പോകാനായിരുന്നു പദ്ധതി. എന്നാൽ യാത്രയ്ക്കിടെ മാനിറ്റോബയിൽവച്ച് അതിശൈത്യം താങ്ങാനാകാതെ മരണപ്പെടുകയായിരുന്നു.
