മഹാരാഷ്ട്ര ഗവർണർ സി പി രാധാകൃഷ്ണനെ ബിജെപി നേതൃത്വത്തിലുള്ള നാഷണൽ ഡെമോക്രാറ്റിക് അലയൻസ് (എൻ‌ഡി‌എ) യുടെ ഉപരാഷ്ട്രപതി സ്ഥാനാർഥിയായി കേന്ദ്രമന്ത്രിയും ബിജെപി അധ്യക്ഷനുമായ ജെപി നദ്ദ പ്രഖ്യാപിച്ചു കഴിഞ്ഞു. അടുത്ത ഉപരാഷ്ട്രപതിയെ ഏകകണ്ഠമായി തിരഞ്ഞെടുക്കണമെന്ന് ഞങ്ങൾ ആഗ്രഹിക്കുന്നു. പ്രതിപക്ഷ നേതാക്കളുമായി ഞങ്ങൾ ബന്ധപ്പെട്ടിട്ടുണ്ട് എന്നു പറഞ്ഞുകൊണ്ടാണ് നദ്ദ, രാധാകൃഷ്ണനെ സ്ഥാനാർഥിയായി പ്രഖ്യാപിച്ചത്. തമിഴ് നാട് ബി ജെ പി മുൻ അധ്യക്ഷനായ രാധാകൃഷ്ണൻ, കോയമ്പത്തൂർ എംപി യായും വിവിധ സംസ്ഥാനങ്ങളിലെ ഗവർണറായും പ്രവർത്തിച്ചിട്ടുണ്ട്.
സി പി രാധാകൃഷ്ണനെക്കുറിച്ചുള്ള 10 വസ്തുതകൾ
1 തമിഴ്‌നാട്ടിൽ ജനിച്ച രാധാകൃഷ്ണൻ കഴിഞ്ഞ വർഷം ജൂലൈ മുതൽ മഹാരാഷ്ട്ര ഗവർണറായി സേവനമനുഷ്ഠിച്ചുവരികയാണ്.
2 68 കാരനായ രാധാകൃഷ്ണൻ 2023 ഫെബ്രുവരി മുതൽ 2024 ജൂലൈ വരെ ജാർഖണ്ഡ് ഗവർണറായി സേവനമനുഷ്ഠിച്ചിട്ടുണ്ട്. 2024 മാർച്ച് മുതൽ ജൂലൈ വരെ തെലങ്കാന ഗവർണറായും പുതുച്ചേരി ലെഫ്റ്റനന്റ് ഗവർണറായും അധിക ചുമതലയും വഹിച്ചിട്ടുണ്ട്.
3 2023 ൽ ജാർഖണ്ഡ് ഗവർണറായി നിയമിതനായതിന്റെ ആദ്യ നാല് മാസത്തിനുള്ളിൽ, രാധാകൃഷ്ണൻ സംസ്ഥാനത്തെ 24 ജില്ലകളിലും സഞ്ചരിച്ച് പൗരന്മാരുമായും ജില്ലാ ഉദ്യോഗസ്ഥരുമായും സംവദിച്ചിട്ടുണ്ട്.
4 മുതിർന്ന ബിജെപി നേതാവായ രാധാകൃഷ്ണൻ കോയമ്പത്തൂരിൽ നിന്ന് രണ്ടുതവണ ലോക്സഭയിലേക്ക് തിരഞ്ഞെടുക്കപ്പെട്ടിട്ടുണ്ട്.
5 തമിഴ്നാട് ബിജെപി സംസ്ഥാന പ്രസിഡന്റായും സേവനമനുഷ്ഠിച്ചിട്ടുണ്ട്.
6 2004 നും 2007 നും ഇടയിൽ തമിഴ്നാട് ബിജെപി അധ്യക്ഷനായിരിക്കെ, അദ്ദേഹം 93 ദിവസം നീണ്ടുനിന്ന 19,000 കിലോമീറ്റർ ‘രഥയാത്ര’ നടത്തി. ഇന്ത്യയിലെ എല്ലാ നദികളെയും ബന്ധിപ്പിക്കുക, ഭീകരത ഇല്ലാതാക്കുക, ഏകീകൃത സിവിൽ കോഡ് നടപ്പിലാക്കുക, തൊട്ടുകൂടായ്മ ഇല്ലാതാക്കുക, മയക്കുമരുന്ന് ഭീഷണിക്കെതിരെ പോരാടുക തുടങ്ങിയ ആവശ്യങ്ങൾ ഉയർത്തിക്കാട്ടുന്നതിനായാണ് യാത്ര സംഘടിപ്പിച്ചത്. വ്യത്യസ്ത ആവശ്യങ്ങൾക്കായി അദ്ദേഹം രണ്ട് പദയാത്രകൾ കൂടി നയിച്ചിട്ടുണ്ട്.
7 1957 ൽ തമിഴ്‌നാട്ടിലെ തിരുപ്പൂരിൽ ജനിച്ച അദ്ദേഹം കോയമ്പത്തൂരിലെ ചിദംബരം കോളേജിൽ നിന്ന് ബിബിഎ ബിരുദം നേടി.
8 ഒരു മികച്ച കായികതാരമായിരുന്ന രാധാകൃഷ്ണൻ, ടേബിൾ ടെന്നീസിൽ കോളേജ് ചാമ്പ്യനും ദീർഘദൂര ഓട്ടക്കാരനുമായിരുന്നു. ക്രിക്കറ്റും വോളിബോളും അദ്ദേഹത്തിന് ഇഷ്ടമായിരുന്നു.
9 ജൂലൈ 21 ന് പാർലമെന്റിന്റെ മൺസൂൺ സമ്മേളനത്തിന്റെ ആദ്യ ദിവസം ആരോഗ്യപരമായ കാരണങ്ങളാൽ ജഗ്ദീപ് ധൻഖർ രാജിവച്ചതിനെത്തുടർന്ന് ഉപരാഷ്ട്രപതി സ്ഥാനം ഒഴിഞ്ഞുകിടന്നു.
10 ഉപരാഷ്ട്രപതി തിരഞ്ഞെടുപ്പിനുള്ള വോട്ടെടുപ്പ് സെപ്റ്റംബർ 9 ന് നടക്കുമെന്ന് തിരഞ്ഞെടുപ്പ് കമ്മീഷൻ നേരത്തെ പ്രഖ്യാപിച്ചിട്ടുണ്ട്. അന്നുതന്നെ വോട്ടെണ്ണലും നിശ്ചയിച്ചിരിക്കയാണ്.
