അരിസോണയിൽ 13 വയസ്സുള്ള ഒരു പെൺകുട്ടി മദ്യപിച്ച് മോഷ്ടിച്ച കാർ ഓടിച്ച് അപകടമുണ്ടാക്കിയതായി ഔദ്യോഗിക വൃത്തങ്ങൾ അറിയിച്ചു. 11 വയസ്സുള്ള ഒരു കുട്ടിയെയും കൂട്ടിയുള്ള യാത്രക്കിടെ വാഹനം ചൊവ്വാഴ്ച പുലർച്ചെ ഒരു മണിയോടെ അപകടത്തിൽപ്പെട്ടു. അരിസോണ ഡിപ്പാർട്ട്മെന്റ് ഓഫ് പബ്ലിക് സേഫ്റ്റി (ഡി പി എസ്) അനുസരിച്ച്, ഫ്ലാഗ്സ്റ്റാഫ് പോലീസ് ഡിപ്പാർട്ട്മെന്റിൽ നിന്ന് മോഷ്ടിക്കപ്പെട്ട കാറാണ് ഇവർ ഉപയോഗിച്ചത്. ഇന്റർസ്റ്റേറ്റ് 40-ൽ ഫ്ലാഗ്സ്റ്റാഫിന് സമീപം തെറ്റായ ദിശയിൽ മീഡിയൻ കടന്ന് പോയ പെൺകുട്ടി, പിന്നീട് വാഹനം ശരിയാക്കി 100 മൈൽ വേഗതയിൽ ഓടിച്ചതായി ഉദ്യോഗസ്ഥർ പറഞ്ഞു.
പെൺകുട്ടി വാഹനം ഗാർഡ്റെയിലിൽ ഇടിച്ചതിനെ തുടർന്ന് കാർ നിരവധി തവണ മറിഞ്ഞ് ഒരു മരത്തിൽ ഇടിച്ചാണ് അപകടം സംഭവിച്ചത്. “അപകടത്തിന്റെ ആഘാതം അത്ര ശക്തമായിരുന്നു, വാഹനം മറിയുന്നതിനിടെ സ്റ്റിയറിംഗ് വീൽ ഒടിഞ്ഞ് വാഹനം നിന്ന സ്ഥലത്ത് നിന്ന് ഏകദേശം 50 അടി ദൂരത്തേക്ക് തെറിച്ചു,” – അരിസോണ ഡിപ്പാർട്ട്മെന്റ് ഓഫ് പബ്ലിക് സേഫ്റ്റി ഉദ്യോഗസ്ഥൻ പറഞ്ഞതിങ്ങനെയാണ്. 13 വയസ്സുള്ള പെൺകുട്ടിയുടെ രക്തത്തിലെ മദ്യത്തിന്റെ അളവ് 0.183 ആയിരുന്നുവെന്ന് അദ്ദേഹം പറഞ്ഞു. അരിസോണയിൽ 21 വയസ്സിന് മുകളിലുള്ള ഡ്രൈവർമാർക്ക് 0.08%ന് മുകളിലുള്ള മദ്യത്തിന്റെ അളവ് ഡി യു ഐ ചാർജിന് കാരണമാകും, എന്നാൽ 21 വയസ്സിന് താഴെയുള്ളവർക്ക് മദ്യത്തിന്റെ അളവ് 0.00% ആയിരിക്കണം.
ആശുപത്രിയിൽ പ്രവേശിപ്പിച്ച ഇരു കുട്ടികൾക്കും ജീവന് ഭീഷണിയില്ലാത്ത പരിക്കുകൾ മാത്രമാണ് ഉണ്ടായതെന്ന് ഡി പി എസ് അറിയിച്ചു. 13 വയസ്സുകാരി ഡി യു ഐ ചാർജുകൾ നേരിടുമെന്ന് ഡി പി എസ് വക്താവ് വ്യക്തമാക്കി. “കുട്ടികൾ സുരക്ഷിതരായതിൽ ആശ്വാസമുണ്ടെന്നും ഡി പി എസ് പ്രസ്താവനയിൽ പറഞ്ഞു. “കൗമാരക്കാരുടെ ആവേശത്തിനുള്ള ഡ്രൈവിംഗും കുട്ടികളുടെ മദ്യപാനവും അത്യന്തം അപകടകരമാണ്. മദ്യപാനത്തിന്റെയും ലൈസൻസില്ലാതെ വാഹനമോടിക്കുന്നതിന്റെയും അപകടങ്ങളെക്കുറിച്ച് കുട്ടികളെ ബോധ്യപ്പെടുത്തണം” – ഡി പി എസ് വിവരിച്ചു.
