തൃശൂർ: ലൈംഗികാതിക്രമ ആരോപണങ്ങൾ നേരിടുന്ന കോൺഗ്രസ് നേതാവും എംഎൽഎയുമായ രാഹുൽ മാങ്കൂട്ടത്തിലിന്റെ അറസ്റ്റ് വൈകുന്നത് തെളിവുകൾ നശിപ്പിക്കാനുള്ള അവസരമൊരുക്കുന്നുവെന്ന് ബിജെപി മുൻ സംസ്ഥാന അധ്യക്ഷൻ കെ. സുരേന്ദ്രൻ. 15 പെൺകുട്ടികളെയും ഒരു ആൺകുട്ടിയെയും രാഹുൽ പീഡിപ്പിച്ചിട്ടുണ്ടെന്നും പരാതികൾ പുറത്തുവരാതിരിക്കാൻ അതിജീവിതകളിൽ സമ്മർദം ചെലുത്തിയെന്നും അദ്ദേഹം ആരോപിച്ചു. “ഇത് ഒറ്റപ്പെട്ട സംഭവമല്ല, മഞ്ഞുമലയുടെ ഒരറ്റം മാത്രമാണ് പുറത്തുവന്നിരിക്കുന്നത്. കേരളത്തിന് കേട്ടുകേൾവില്ലാത്ത സംഭവമാണിത്” എന്ന് സുരേന്ദ്രൻ പറഞ്ഞു.
രാഹുലിന് സംരക്ഷണം നൽകുന്നത് കോൺഗ്രസിൽ പുതുതായി രൂപംകൊണ്ട അധോലോക സംഘമാണെന്നും അറസ്റ്റ് വൈകിക്കുന്നത് രക്ഷപ്പെടാനുള്ള പഴുതൊരുക്കലാണെന്നും സുരേന്ദ്രൻ കുറ്റപ്പെടുത്തി. “ഇരകൾ പങ്കുവച്ചിട്ടുണ്ടെന്നും ആൺകുട്ടിയും പീഡിപ്പിക്കപ്പെട്ടിട്ടുണ്ടെന്നും ഗുരുതര വിവരങ്ങൾ പുറത്തുവരുന്നു. ഈ തെളിവുകൾ പൊലീസിന്റെ കൈവശമുണ്ട്. സംഘടിത കുറ്റകൃത്യമാണ് നടന്നത്. എംഎൽഎയെ ഇതുവരെ കണ്ടെത്താനായില്ലെന്നത് വിശ്വസിക്കാനാവില്ല; ഉന്നതരുടെ സഹായത്തോടെയാണ് മുങ്ങിനടക്കുന്നത്” എന്നും അദ്ദേഹം ആരോപിച്ചു.
നേരത്തെ വന്ന പല കേസുകളിലും രാഹുൽ സംരക്ഷണം നേടിയിരുന്നുവെന്നും ഇപ്പോഴത്തെ കേസ് സാധാരണ രീതിയിൽ കൈകാര്യം ചെയ്യരുതെന്നും സുരേന്ദ്രൻ ആവശ്യപ്പെട്ടു. “കുറ്റകൃത്യത്തിന് പിന്നിലുള്ള എല്ലാവരെയും പുറത്തുകൊണ്ടുവരണം. രാഹുലിനെ മാത്രം പിടികൂടിയാൽ പോര, സംരക്ഷിച്ചവരെയും നിയമത്തിന് മുന്നിൽ കൊണ്ടുവരണം” എന്ന് അദ്ദേഹം ആവർത്തിച്ചു.
