കൊച്ചി: കൊച്ചിയില്‍ നിന്ന് ഡല്‍ഹിയിലേക്ക് പുറപ്പെടേണ്ടിയിരുന്ന എയര്‍ ഇന്ത്യയുടെ എഐ 504 വിമാനം റണ്‍വേയില്‍ നിന്ന് തെന്നിമാറി. ഇതേത്തുടര്‍ന്ന് ടേക്ക് ഓഫ് നിര്‍ത്തിവെച്ചു. രാത്രി 10.15ന് ബോര്‍ഡിങ് ആരംഭിച്ച വിമാനം ടേക്ക് ഓഫിനായി റണ്‍വേയിലേക്ക് നീങ്ങുമ്പോഴായിരുന്നു സംഭവം. ഹൈബി ഈഡന് എംപിയടക്കം വിമാനത്തിലുണ്ടായിരുന്നു. അദ്ദേഹം തന്റെ ഫേസ് ബുക്ക് പോസ്റ്റിലൂടെയാണ് ഈ വിവരം ആദ്യം പുറത്തുവിട്ടത്.
എന്‍ജിന്‍ തകരാറാണ് പ്രശ്‌നത്തിന് കാരണമെന്ന് വിമാനജീവനക്കാര്‍ അറിയിച്ചതായി ഹൈബി ഈഡന് എംപി പറഞ്ഞു. അതേസമയം യാത്രക്കാരെ മറ്റൊരു വിമാനത്തിലേക്ക് മാറ്റി 2.45-ഓടെ വിമാനം പുറപ്പെട്ടു.
കഴിഞ്ഞ ദിവസം കേരളത്തില്‍ നിന്നുള്ള എംപിമാരടക്കം യാത്രക്കാരായ മറ്റൊരു എയര്‍ ഇന്ത്യ വിമാനത്തിന് ചെന്നൈയില്‍ അടിയന്തര ലാന്‍ഡിംഗ് നടത്തേണ്ടി വന്നിരുന്നു. തിരുവനന്തപുരം-ഡല്‍ഹി എയര്‍ ഇന്ത്യ വിമാനം വിമാനമാണ് റഡാറുമായുള്ള ബന്ധത്തില്‍ തകരാര്‍ നേരിട്ടതിനെ തുടര്‍ന്ന് ചെന്നൈ വിമാനത്താവളത്തില്‍ അടിയന്തരമായി ഇറക്കിയത്. കേരളത്തില്‍ നിന്നുള്ള നാല് എംപിമാര്‍ അടക്കം അഞ്ച് എംപിമാര്‍ യാത്ര ചെയ്തിരുന്ന വിമാനമായിരുന്നു ഇത്. എം പിമാരായ കെ സി വേണുഗോപാല്‍, കൊടിക്കുന്നില്‍ സുരേഷ്, അടൂര്‍ പ്രകാശ്, കെ രാധാകൃഷ്ണന്‍, തിരുനെല്‍വേലി എംപി റോബര്‍ട്ട് ബ്രൂസ് എന്നിവരാണ് വിമാനത്തിലുണ്ടായിരുന്നത്.
