വാഷിംഗ്ടൺ: ലോകമെമ്പാടുമുള്ള വാണിജ്യ വിമാനക്കമ്പനികൾ വ്യാപകമായി ഉപയോഗിക്കുന്ന എയർബസ് എ320 വിമാനങ്ങൾ അടിയന്തരമായി സോഫ്റ്റ്വെയർ അപ്ഡേറ്റിലേക്ക് കടക്കുന്നു. കഴിഞ്ഞമാസം ജെറ്റ്ബ്ലൂവിൻ്റെ എ320 വിമാനം പറക്കലിനിടെ പെട്ടെന്ന് താഴ്ന്ന ഉയരത്തിലേക്ക് എത്തി വലിയൊരു അപകടത്തിൻ്റെ വക്കോളം എത്തിയിരുന്നു. ഇതിനു പിന്നാലെ ഇത്തരത്തിലുള്ള പ്രശ്നങ്ങൾ പരിഹരിക്കാൻ ഒരു സോഫ്റ്റ്വെയർ അപ്ഡേറ്റ് ആവശ്യമാണെന്ന് വിമാന നിർമ്മാതാക്കളും യൂറോപ്യൻ വ്യോമയാന സുരക്ഷാ റെഗുലേറ്റർമാരും വെള്ളിയാഴ്ച പറഞ്ഞു.
അതിതീവ്രമായ സൗരവികിരണം ഫ്ലൈറ്റ് കൺട്രോൾ സംബന്ധിച്ച നിർണായക ഡേറ്റയെ ബാധിക്കാനിടയുണ്ടെന്ന വിലയിരുത്തലിനെത്തുടർന്ന്, എയർബസ് എ320 വിഭാഗത്തിൽപ്പെട്ട ഒട്ടേറ വിമാനങ്ങൾ ഇത്തരം സോഫ്റ്റ്വെയർ മാറ്റത്തിന് വിധേയമാകും. ഇത് വിമാനങ്ങളുടെ കാലതാമസത്തിന് കാരണമാകുമെന്നാണ് റിപ്പോർട്ട്. താങ്ക്സ്ഗിവിംഗ് അവധി ദിവസങ്ങളെ തുടർന്ന് യാത്രയിലായിരുന്ന അമേരിക്കക്കാരെയടക്കം ഇത് ബാധിച്ചേക്കും. സോഫ്റ്റ്വെയർ അപ്‌ഡേഷനുവേണ്ടി ഈ വിമാനങ്ങൾ നിശ്ചിതസമയത്തേക്ക് നിലത്തിറക്കേണ്ടതിനാലാണ് സർവീസുകളിൽ തടസ്സം നേരിടുക.
ജെറ്റ്ബ്ലൂ സംഭവത്തിന് കാരണമായതെന്ന് വിശ്വസിക്കപ്പെടുന്നത് തീവ്രമായ സൗരോർജ്ജ വികിരണമാണ്. ഇത് എ320 വിമാനങ്ങളുടെ വിമാന നിയന്ത്രണങ്ങളുടെ പ്രവർത്തനത്തിന് നിർണായകമായ ഡാറ്റയെ നശിപ്പിച്ചേക്കാമെന്നാണ് വിലയിരുത്തൽ. അതുകൊണ്ട് ഇത്തരം ഘട്ടങ്ങൾ നേരിടുന്നതിന് സോഫ്റ്റ്വെയർ അപ്ഡേറ്റുകൾ ആവശ്യമാണ്. യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസി എ320 വിമാനങ്ങളുടെ ഓപ്പറേറ്റർമാരോട് ഈ പ്രശ്നം പരിഹരിക്കാൻ ആവശ്യപ്പെട്ടുകൊണ്ട് ഒരു നിർദ്ദേശം പുറപ്പെടുവിച്ചു. ഇത് ഫ്ലൈറ്റ് ഷെഡ്യൂളുകളിൽ ഹ്രസ്വകാല തടസ്സം ഉണ്ടാക്കിയേക്കുമെന്ന് മുന്നറിയിപ്പുണ്ട്
അമേരിക്കൻ എയർലൈൻസിന് എ320 വിഭാഗത്തിൽ നിന്നുള്ള ഏകദേശം 480 വിമാനങ്ങളുണ്ട്, അതിൽ 209 എണ്ണത്തിന് സോഫ്റ്റവെയർമാറ്റം ആവശ്യമാണ്. പല വിമാനങ്ങൾക്കും ഏകദേശം രണ്ട് മണിക്കൂർ എടുക്കുന്ന പ്രക്രിയയാണിത്. വെള്ളിയാഴ്ച ബഹുഭൂരിപക്ഷത്തിനും അപ്ഡേറ്റുകൾ പൂർത്തിയാക്കുമെന്ന് എയർലൈൻ പറഞ്ഞു. ചുരുക്കം ചിലതിൽ ശനിയാഴ്ചയോടെയോ പൂർത്തിയാകൂ.
തങ്ങളുടെ വിമനങ്ങളിൽ ചില കാലതാമസങ്ങൾ പ്രതീക്ഷിക്കുന്നുണ്ടെന്നും താങ്ക്സ്ഗിവിംഗ് അവധിക്കാല യാത്രയിൽ നിന്ന് വീട്ടിലേക്ക് മടങ്ങുന്നവരെ നിരാശപ്പെടുത്തുന്ന തരത്തിൽ വിമാനം റദ്ദാക്കുന്നത് കുറയ്ക്കുന്നതിലാണ് ശ്രദ്ധയെന്നും അമേരിക്കൻ എയർലൈൻസ് പറഞ്ഞു. സുരക്ഷയായിരിക്കും തങ്ങളുടെ പ്രധാന മുൻഗണനയെന്നും എന്ന് അവർ പറഞ്ഞു.
ഡെൽറ്റയാകട്ടെ തങ്ങളുടെ വിമാനങ്ങളിൽ 50-ൽ താഴെ എണ്ണം മാത്രമേ ഈ അപ്ഡേറ്റുകളിലൂടെ കടന്നുപോകൂ എന്ന് അറിയിച്ചിട്ടുണ്ട്. അതേസമയം, യുണൈറ്റഡ് എയർലൈൻസും ഹവായിയൻ എയർലൈൻസും ഈ പ്രശ്നം തങ്ങളെ ബാധിച്ചിട്ടില്ലെന്ന് വ്യക്തമാക്കിയിട്ടുണ്ട്.
ഇന്ത്യയേയും ബാധിക്കും
ഇന്ത്യൻ എയർലൈൻസുകളായ ഇൻഡിഗോ, എയർ ഇന്ത്യ, എയർ ഇന്ത്യ എക്സ്പ്രസ് എന്നിവ പ്രവർത്തിപ്പിക്കുന്ന ഏകദേശം 200–250 വിമാനങ്ങളെ തീരുമാനം ബാധിക്കും.
ബോയിംഗിനൊപ്പം ലോകത്തിലെ ഏറ്റവും വലിയ വിമാന നിർമ്മാതാക്കളിൽ ഒന്നാണ് എയർബസ്. നെതർലാൻഡ്‌സിൽ രജിസ്റ്റർ ചെയ്തിട്ടുണ്ടെങ്കിലും ഇതിന്റെ പ്രധാന ആസ്ഥാനം ഫ്രാൻസിലാണ്. ബോയിംഗിന്റെ 737 ന്റെ പ്രാഥമിക എതിരാളിയാണ് A320. 2010 കളുടെ മധ്യത്തിൽ എയർബസ് അതിന്റെ എഞ്ചിൻ അപ്ഡേറ്റ് ചെയ്തു, ഈ വിഭാഗത്തിലുള്ള വിമാനങ്ങളെ A320neo എന്നാണ് വിളിക്കുന്നത്.
Airbus A320 aircraft to undergo software update, flights will face delays
