2022 ന് ശേഷം ആമസോൺ നടത്തുന്ന ഏറ്റവും വലിയ കൂട്ടപിരിച്ചുവിടലിന് കാരണം എ ഐ അല്ലെന്ന് തുറന്ന് പറഞ്ഞ് കമ്പനി സിഇഒ ആന്റി ജാസി. സാമ്പത്തിക ബുദ്ധിമുട്ടോ ,നിർമിത ബുദ്ധിയോ അല്ല തൊഴിലാളികളെ ജോലിയിൽ നിന്ന് പറഞ്ഞുവിട്ടതിന് കാരണം. 2017-2022 കാലഘട്ടത്തില്‍ ജോലിക്കാരുടെ എണ്ണത്തിൽ വലിയ വർധനവാണ് ഉണ്ടായത്. പെട്ടന്നുണ്ടായ ഈ മാറ്റം തൊഴിലാളികളുടെ ദൈനംദിന പ്രവർത്തനത്തെ മനസിലാക്കുന്നതിനും നിരീക്ഷിക്കുന്നതിനും ഏറെ ബുദ്ധിമുട്ടുണ്ടാക്കി. ഇത് കമ്പനിയുടെ പ്രവർത്തനത്തെ മന്ദഗതിയിലാക്കുന്നതിനും കാരണമായതായി അദ്ദേഹം പറഞ്ഞു.
അതിവേഗ വളർച്ചയാണ് എല്ലാ മേഖലകളിലും ഉണ്ടായിക്കൊണ്ടിരിക്കുന്നത് . ഇങ്ങനെ മുന്നോട്ട് പോകുന്ന ഈ യുഗത്തിൽ ഒന്നിന് വേണ്ടിയും പിന്നിലോട്ട് പോകാൻ സാധിക്കില്ല . തുടക്കത്തിലേ സ്റ്റാർട്ടപ്പ് മാതൃകയിലേക്ക് കമ്പനിയെ എത്തിക്കാനും, അങ്ങനെ പ്രവർത്തനം വേഗത്തിലാക്കാനുമാണ് ഇങ്ങനെയൊരു തീരുമാനത്തിലേക്ക് കമ്പനി എത്തിയതെന്നും ആന്റി ജാസി വ്യക്തമാക്കി.
പിരിച്ചുവിടലിൽ 14000 തൊഴിലാളികൾക്കാണ് ജോലി നഷ്ടമായത്. നടപടിയുടെ ഭാഗമായി കമ്പനി തൊഴിലാളികൾക്ക് ഒഫിഷ്യൽ മെയിൽ അയക്കുകയും ചെയ്തിരുന്നു. ഓഫീസ് ,കോര്‍പ്പറേറ്റ് ജോലികളിലുള്ളവരെയാണ് പ്രധാനമായി ഒഴിവാക്കിയിരിക്കുന്നത്. സംഭവം വലിയ ചർച്ച ആയതോടെ ഇതിന് പിന്നിൽ എഐ ആണെന്ന തരത്തിലുള്ള വാർത്തകൾ വലിയ തോതിൽ പ്രചരിച്ചിരുന്നു. ഇതിനൊരു വിശദീകരണവുമായാണ് ആമസോൺ മേധാവി തന്നെ രംഗത്തെത്തിയത്.
Amazon’s mass layoffs; CEO reveals it’s not AI
