ജയിലിൽ കഴിയുന്ന ഗുണ്ടാനേതാവ് ലോറൻസ് ബിഷ്ണോയിയുടെ ഇളയസഹോദരനും ബാബാ സിദ്ദിഖി കൊലപാതകത്തിന്റെ പ്രധാന ആസൂത്രകനുമായ അൻമോൽ ബിഷ്ണോയിയെ അമേരിക്ക നാടുകടത്തി. യുഎസ് ആഭ്യന്തര സുരക്ഷാ വകുപ്പിന്റെ ഇമെയിലിലൂടെ ബാബാ സിദ്ദിഖിയുടെ മകൻ സീഷാൻ സിദ്ദിഖിക്ക് ലഭിച്ച വിവരം അനുസരിച്ച്, നവംബർ 18 ന് അൻമോലിനെ യുഎസിൽനിന്ന് നീക്കം ചെയ്തു. നാളെ (നവംബർ 19) അൻമോനെ ഡൽഹിയിലെത്തിക്കുമെന്നാണ് പ്രതീക്ഷിക്കുന്നത്.
2024 ഒക്ടോബർ 12 ന് മുംബൈയിൽ നടന്ന ബാബാ സിദ്ദിഖി വധത്തിന്റെ ഗൂഢാലോചനയ്ക്ക് പിന്നിൽ അൻമോലാണെന്ന് മുംബൈ പൊലീസിന്റെ കുറ്റപത്രത്തിൽ വ്യക്തമാക്കിയിട്ടുണ്ട്. സൽമാൻ ഖാന്റെ വസതിക്കുനേരെയുള്ള വെടിവയ്പ്പ്, പഞ്ചാബ് ഗായകൻ സിദ്ധു മൂസെവാലയുടെ കൊലപാതകം തുടങ്ങി 18 ൽ പരം കേസുകളിൽ പ്രതിയായ അൻമോലിനെ പിടികിട്ടാപ്പുള്ളിയാക്കി എൻഐഎ 10 ലക്ഷം രൂപ പാരിതോഷികം പ്രഖ്യാപിച്ചിരുന്നു. പഞ്ചാബിലെ ഫാസിൽക്ക സ്വദേശിയായ അൻമോൽ വ്യാജ പാസ്പോർട്ടിൽ നേപ്പാൾ വഴി ദുബായിലും കെനിയയിലുമെത്തി അവസാനം യുഎസിലായിരുന്നു.
കഴിഞ്ഞ വർഷം നവംബറിൽ യുഎസിൽ അറസ്റ്റിലായ അൻമോലിന്റെ നാടുകടത്തൽ ഇന്ത്യൻ അന്വേഷണ ഏജൻസികൾക്ക് വൻ നേട്ടമാണ്. അദ്ദേഹത്തിന്റെ ചോദ്യം ചെയ്യൽ ബിഷ്‌ണോയി സംഘത്തിന്റെ അന്താരാഷ്ട്ര ബന്ധങ്ങളും കൂടുതൽ കേസുകളും പുറത്തുകൊണ്ടുവരുമെന്നാണ് പ്രതീക്ഷ. ബാബാ സിദ്ദിഖിയുടെ കുടുംബം ഇക്കാര്യം സ്ഥിരീകരിച്ചുകൊണ്ട് ഇമെയിലിന്റെ സ്ക്രീൻഷോട്ട് പുറത്തുവിട്ടു.
