കൊച്ചി: ഫുട്ബോൾ ഇതിഹാസം ലയണൽ മെസിയും അർജന്റീന ദേശീയ ഫുട്ബോൾ ടീമും 2025 നവംബറിൽ കേരളത്തിലെത്തുന്നതിന്റെ ആവേശം പങ്കുവെച്ച് അർജന്റീന ഫുട്ബോൾ അസോസിയേഷൻ (എഎഫ്എ) പ്രമോ വീഡിയോ പുറത്തിറക്കി. ഇൻസ്റ്റഗ്രാം, ഫേസ്ബുക്ക്, എക്സ് തുടങ്ങിയ സമൂഹമാധ്യമ പ്ലാറ്റ്‌ഫോമുകളിലൂടെ പങ്കുവെച്ച വീഡിയോയിൽ “ഞങ്ങൾ കേരളത്തിലേക്ക് വരുന്നു” എന്ന സന്ദേശത്തോടൊപ്പം പ്രധാനമന്ത്രി നരേന്ദ്ര മോദി, മുഖ്യമന്ത്രി പിണറായി വിജയൻ, കായിക മന്ത്രി വി. അബ്ദുറഹിമാൻ, റിപ്പോർട്ടർ ടിവി എന്നിവർക്ക് നന്ദി അറിയിച്ചിട്ടുണ്ട്.
ഒരു വർഷം മുൻപ് മാഡ്രിഡിലെ എഎഫ്എ ആസ്ഥാനത്ത് കേരള സർക്കാരുമായി ചേർന്ന് ആരംഭിച്ച പദ്ധതിയുടെ ഫലമാണ് ഈ സൗഹൃദ മത്സരമെന്ന് എഎഫ്എ ഇന്ത്യയുടെ കുറിപ്പിൽ വ്യക്തമാക്കി. ആഗോള കായിക മേഖലയിൽ പുതിയ അധ്യായം തുറക്കാനുള്ള എഎഫ്എയുടെ ശ്രമത്തിന്റെ ഭാഗമായാണ് ഈ സന്ദർശനമെന്നും, കേരളത്തിലെ ഫുട്ബോൾ ആരാധകർക്ക് അവിസ്മരണീയ അനുഭവമാകുമെന്നും കുറിപ്പിൽ പറയുന്നു.
https://www.instagram.com/reel/DNsavyvXjKn/?igsh=MWFuMGpqMWhlOTRobA==
ഇന്‍സ്റ്റഗ്രാം, ഫേസ്ബുക്ക്, എക്സ് പ്ലാറ്റ്‌ഫോമുകളിലൂടെയാണ് പ്രമോ വീഡിയോ എഎഫ്എ ഇന്ത്യ പങ്കുവെച്ചത്. ‘അര്‍ജന്റീന ദേശീയ ടീം അന്താരാഷ്ട്ര സൗഹൃദ മത്സരങ്ങളുടെ ഭാഗമായി 2025 നവംബറില്‍ കേരളത്തിലെത്തും. ഒരുവര്‍ഷം മുന്‍പ് മാഡ്രിഡിലെ ഞങ്ങളുടെ ആസ്ഥാനത്തുവെച്ച് കേരളാ സര്‍ക്കാരുമായി ആരംഭിച്ച പദ്ധതിയാണിത്. ആഗോളതലത്തില്‍ കായിക മേഖലയുടെ വിപുലീകരണത്തിന് എഎഫ്എ പുതിയ അധ്യായം ആരംഭിക്കുകയാണ്’- എഎഫ്എ ഇന്ത്യ സമൂഹമാധ്യമങ്ങളില്‍ പങ്കുവെച്ച കുറിപ്പില്‍ പറയുന്നു.
മെസി ഉള്‍പ്പെടുന്ന അര്‍ജന്റീയുടെ ഫുട്‌ബോള്‍ ടീം കേരളത്തില്‍ എത്തുമെന്ന് അര്‍ജന്റീന ഫുട്‌ബോള്‍ അസോസിയേഷന്‍ ഔദ്യോഗികമായി അറിയിച്ചിരുന്നു. നവംബര്‍ 10നും 18നും ഇടയിലുള്ള ദിവസങ്ങളിലാണ് അര്‍ജന്റീന ടീമിന്റെ കേരള സന്ദര്‍ശനം. ഫിഫ അനുവദിച്ച നവംബർ വിൻഡോയിൽ ലുവാണ്ട, കേരളം എന്നിവിടങ്ങളിൽ നവംബർ 10നും 18നും ഇടയിൽ അർജൻ്റീന ഫുട്ബോൾ ടീം കളിക്കുമെന്നാണ് എഎഫ്എ അറിയിച്ചിരിക്കുന്നത്. കേരള സര്‍ക്കാരുമായി ചേര്‍ന്ന് റിപ്പോര്‍ട്ടര്‍ ബ്രോഡ്കാസ്റ്റിംഗ് കമ്പനി പ്രൈവറ്റ് ലിമിറ്റഡാണ് ഫുട്‌ബോള്‍ ലോക ജേതാക്കളെ കേരളത്തിലെത്തിക്കുന്നത്.
