കൃഷിവകുപ്പ് പ്രിൻസിപ്പൽ സെക്രട്ടറിയായിരുന്ന ബി. അശോകിനെ പഴ്സണൽ & അഡ്മിനിസ്ട്രേഷൻ വകുപ്പിലേക്ക് സ്ഥലംമാറ്റി. മുഖ്യമന്ത്രിയുടെ കീഴിലുള്ള ഈ വകുപ്പിലേക്കാണ് അശോകിന്റെ പുതിയ നിയമനം. നേരത്തെ, അശോകിനെ കേരള ട്രാൻസ്‌പോർട്ട് ഡവലപ്‌മെന്റ് ഫിനാൻസ് കോർപറേഷൻ ചെയർമാനായി മാറ്റിയ സർക്കാർ നടപടി കേന്ദ്ര അഡ്മിനിസ്ട്രേറ്റീവ് ട്രൈബ്യൂണൽ സ്റ്റേ ചെയ്തിരുന്നു. ഈ സ്റ്റേയെ തുടർന്ന് അവധി അവസാനിപ്പിച്ച് അശോക് കൃഷിവകുപ്പിൽ പ്രിൻസിപ്പൽ സെക്രട്ടറിയായി തിരികെ ചുമതലയേറ്റിരുന്നു.
ദിവസങ്ങൾക്കുള്ളിൽ വീണ്ടും മാറ്റം
അശോകിന്റെ തിരിച്ചുവരവിന് ദിവസങ്ങൾക്കുള്ളിൽ തന്നെ സർക്കാർ വീണ്ടും സ്ഥലംമാറ്റ ഉത്തരവിറക്കുകയായിരുന്നു. കൃഷിവകുപ്പിൽ നിന്ന് മാറ്റുന്നതിനെതിരെ ട്രൈബ്യൂണൽ സ്റ്റേ നൽകിയിരുന്നെങ്കിലും, പുതിയ ഉത്തരവ് മുഖ്യമന്ത്രിയുടെ നേരിട്ടുള്ള മേൽനോട്ടത്തിലുള്ള വകുപ്പിലേക്കാണ്. ഈ നടപടി ഉന്നത ഉദ്യോഗസ്ഥന്റെ സ്ഥാനചലനത്തെ ചുറ്റിപ്പറ്റിയുള്ള ചർച്ചകൾക്ക് വീണ്ടും വഴിവെക്കുന്നു.
കേരയിൽ നടപടി
കേര പദ്ധതി വാര്‍ത്ത ചോര്‍ത്തലിന് പിന്നാലെയായിരുന്നു ആദ്യത്തെ നടപടി. കേര പദ്ധതിക്ക് ലോകബാങ്ക് നല്‍കിയ ഫണ്ട് വകമാറ്റിയ വിവരം മാധ്യമപ്രവര്‍ത്തകര്‍ക്കു ലഭിച്ചതെങ്ങനെയെന്ന് അന്വേഷിക്കാന്‍ നിയോഗിച്ച ബി അശോക് മുഖ്യമന്ത്രിയുടെ ഓഫീസിനെ പ്രതിരോധത്തിലാക്കുന്ന റിപ്പോര്‍ട്ട് സമര്‍പ്പിച്ചതിനു പിന്നാലെയാണ് സ്ഥലംമാറ്റം. കൃഷി വകുപ്പിലെ നാല് ഉദ്യോഗസ്ഥര്‍ മാത്രം കൈകാര്യം ചെയ്ത ഫയല്‍ എങ്ങനെ മുഖ്യമന്ത്രിയുടെ ഓഫീസിന് ലഭിച്ചുവെന്ന് അന്വേഷണ റിപ്പോര്‍ട്ടില്‍ ബി അശോക് സൂചിപ്പിച്ചിരുന്നു
