പട്ന: വോട്ടെടുപ്പ് ആരോപണങ്ങളെയും വികസന വാഗ്ദാനങ്ങളെയും മറികടന്ന് ബിഹാറിൽ നിതീഷ് കുമാറിന്റെ എൻഡിഎ സഖ്യം അധികാരം നിലനിർത്തുമെന്ന് എക്സിറ്റ് പോൾ ഫലങ്ങൾ. വിവിധ ഏജൻസികളുടെ സർവേകൾ എൻഡിഎയ്ക്ക് 130ൽ കൂടുതൽ സീറ്റുകൾ പ്രവചിക്കുന്നു, കേവലഭൂരിപക്ഷത്തിനുള്ള 122 സീറ്റുകൾ എളുപ്പം മറികടക്കുമെന്ന് സൂചന. ബിജെപി–ജെഡിയു നേതൃത്വത്തിലുള്ള സഖ്യത്തിന്റെ തേരോട്ടം തുടരുമെന്നാണ് പൊതുവായ പ്രവചനം.
ഇന്ത്യാ മുന്നണിക്ക് വലിയ തിരിച്ചടി നൽകുന്നതാണ് എക്സിറ്റ് പോളുകൾ. മൂന്ന് സർവേകൾ മാത്രം 100ൽ കൂടുതൽ സീറ്റുകൾ പ്രവചിക്കുമ്പോൾ ബാക്കിയെല്ലാം 100ൽ താഴെയാണ് കണക്കാക്കുന്നത്. പീപ്പിൾസ് പൾസ് സർവേ എൻഡിഎയ്ക്ക് 133–159 സീറ്റുകളും ഇന്ത്യാ സഖ്യത്തിന് 75–101 സീറ്റുകളും നൽകുന്നു. മറ്റുള്ളവർക്ക് 2–5 സീറ്റുകൾ മാത്രം. അതേസമയം മുഖ്യമന്ത്രി സ്ഥാനത്തേക്ക് ജനങ്ങൾ താല്പര്യപ്പെടുന്നത് തേജസ്വി യാദവിനെയെന്നും എക്സിറ്റ് പോളുകൾ പറയുന്നു. പീപ്പിൾസ് പൾസിന്റെ സർവേയിൽ മുഖ്യമന്ത്രി സ്ഥാനത്തേക്ക് 32% ജനങ്ങളും താല്പര്യപ്പെടുന്നത് തേജസ്വി യാദവിനെയാണ്.
പ്രശാന്ത് കിഷോറിന്റെ ജൻ സുരാജ് പാർട്ടി വലിയ ചലനമുണ്ടാക്കില്ലെന്നും എക്സിറ്റ് പോളുകൾ വ്യക്തമാക്കുന്നു. ചിലത് പരമാവധി 5 സീറ്റും മറ്റുചിലത് പൂജ്യം സീറ്റും മാത്രം പ്രവചിക്കുന്നു. പീപ്പിൾസ് ഇൻസൈറ്റ് സർവേ എൻഡിഎയ്ക്ക് 133–148 സീറ്റുകളും ഇന്ത്യാ സഖ്യത്തിന് 87–102 സീറ്റുകളും ജൻ സുരാജിന് 2 സീറ്റും മറ്റുള്ളവർക്ക് 3–6 സീറ്റുകളും കണക്കാക്കുന്നു.
അതേസമയം ബിഹാർ നിയമസഭാ തെരഞ്ഞെടുപ്പിന്റെ രണ്ടാംഘട്ട പോളിംഗ് വൻ വിജയമായി. വൈകുന്നേരം 5 മണി വരെ 68.52 ശതമാനം വോട്ട് രേഖപ്പെടുത്തി, ഒന്നാംഘട്ടത്തിലെ 64.66 ശതമാനത്തെ മറികടന്നു. 20 ജില്ലകളിലായി 122 മണ്ഡലങ്ങളിലാണ് വോട്ടെടുപ്പ് നടന്നത്. 45,339 പോളിംഗ് ബൂത്തുകളും 1302 സ്ഥാനാർഥികളും രംഗത്തുണ്ടായിരുന്നു.
