തിരുവനന്തപുരം കോർപ്പറേഷൻ തെരഞ്ഞെടുപ്പിൽ തലസ്ഥാനം പിടിക്കാനുള്ള ശ്രമത്തിൽ പ്രമുഖരെ അണിനിരത്തി ബിജെപി. ആദ്യഘട്ടത്തിൽ 67 സ്ഥാനാർത്ഥികളെ പ്രഖ്യാപിച്ചു. ശാസ്തമംഗലം വാർഡിൽ മുൻ ഡിജിപി ആർ ശ്രീലേഖയും പാളയത്ത് മുൻ കായികതാരവും സ്പോർട്സ് കൗൺസിൽ സെക്രട്ടറിയുമായ പദ്മിനി തോമസും മത്സരിക്കും. കൊടുങ്ങന്നൂർ വാർഡിൽ വിവി രാജേഷും പോരിനിറങ്ങിയിട്ടുണ്ട്.
ഭരിക്കാൻ ഒരവസരം ചോദിക്കുകയാണെന്നും ഇന്ത്യയിലെ ഏറ്റവും മികച്ച നഗരമാക്കി തിരുവനന്തപുരത്തെ മാറ്റുകയാണ് ലക്ഷ്യമെന്നും സ്ഥാനാർത്ഥികളെ പ്രഖ്യാപിച്ചുകൊണ്ട് സംസ്ഥാന അധ്യക്ഷൻ രാജീവ് ചന്ദ്രശേഖർ പറഞ്ഞു. അഴിമതിരഹിത അനന്തപുരി സൃഷ്ടിക്കുമെന്നും അദ്ദേഹം വ്യക്തമാക്കി. തിരുമലയിൽ ദേവിമ, കരമനയിൽ കരമന അജി, നേമത്ത് എംആർ ഗോപൻ എന്നിവരും സ്ഥാനാർത്ഥികളാണ്.
പേരൂർക്കടയിൽ ടിഎസ് അനിൽകുമാറും കഴക്കൂട്ടത്ത് അനിൽ കഴക്കൂട്ടവും ബിജെപി സ്ഥാനാർത്ഥികളായി മത്സരിക്കും. തെരഞ്ഞെടുപ്പിൽ ശക്തമായ മത്സരം പ്രതീക്ഷിക്കുന്നതിനിടെ പ്രമുഖരെ ഇറക്കി വിജയം ഉറപ്പാക്കാനുള്ള തന്ത്രമാണ് ബിജെപിയുടേത്.
