ധർമസ്ഥലയിൽ ഭൂമി കുഴിച്ചുള്ള പരിശോധന നിർത്തിവെക്കാൻ സർക്കാർ തീരുമാനിച്ചു. ലഭിച്ച മൃതദേഹ ഭാഗങ്ങളുടെ ഫൊറൻസിക് പരിശോധനാ ഫലം ലഭിച്ച ശേഷം മാത്രമേ തുടർനടപടികൾ സ്വീകരിക്കൂവെന്ന് സർക്കാർ നിയമസഭയിൽ വ്യക്തമാക്കി. സമ്മർദങ്ങൾക്ക് വഴങ്ങിയാണ് ഈ തീരുമാനമെന്ന് സൂചനയുണ്ട്. തുടരന്വേഷണത്തിന്റെ ഉത്തരവാദിത്തം പ്രത്യേക അന്വേഷണ സംഘത്തിന് (SIT) വിട്ടുകൊടുത്തതായും ആഭ്യന്തരമന്ത്രി ജി. പരമേശ്വര അറിയിച്ചു.
SIT മേധാവി പ്രണബ് മൊഹന്തിയുമായി ജി. പരമേശ്വര നടത്തിയ ഒരു മണിക്കൂർ നീണ്ട കൂടിക്കാഴ്ചയ്ക്ക് ശേഷമാണ് ഈ നിലപാട് സർക്കാർ വ്യക്തമാക്കിയത്. അന്തിമ തീരുമാനം SIT-ന് എടുക്കാമെന്നും, ഫൊറൻസിക് ഫലങ്ങളെ ആശ്രയിച്ചായിരിക്കും അന്വേഷണത്തിന്റെ തുടർനടപടികളെന്നും മന്ത്രി നിയമസഭയിൽ അറിയിച്ചു. ഈ വിഷയത്തിൽ സർക്കാർ നേരിടുന്ന സമ്മർദങ്ങളും പൊതുജനാഭിപ്രായവും തീരുമാനത്തെ സ്വാധീനിച്ചിട്ടുണ്ടെന്നാണ് വിലയിരുത്തൽ.
