ന്യൂഡല്‍ഹി : ഖാലിസ്ഥാന്‍ വിഘടനവാദികളെ കൊല്ലാനുള്ള വിവിധ പദ്ധതികള്‍ക്ക് പിന്നില്‍ ഇന്ത്യന്‍ സര്‍ക്കാരാണെന്ന് ആരോപിച്ച് ബ്രിട്ടീഷ് രഹസ്യാന്വേഷണ ഏജന്‍സിയായ ജിസിഎച്ച്ക്യു . ഇതുമായി ബന്ധപ്പെട്ട റിപ്പോര്‍ട്ട് ജിസിഎച്ച്ക്യു കാനഡയ്ക്ക് കൈമാറിയെന്നും ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.
‘ഇന്‍സൈഡ് ദി ഡെത്ത്‌സ് ദാറ്റ് റോക്ക്ഡ് ഇന്ത്യാസ് റിലേഷന്‍സ് വിത്ത് ദി വെസ്റ്റ്’ എന്ന തലക്കെട്ടിലുള്ള ‘ബ്ലൂംബര്‍ഗ് ഒറിജിനല്‍സ്’ എന്ന വീഡിയോ ഡോക്യുമെന്ററിയിലാണ് വിവരങ്ങളുള്ളത്.
കാനഡയില്‍ ഹര്‍ദീപ് സിംഗ് നിജ്ജാറിന്റെ കൊലപാതകം, ബ്രിട്ടനില്‍ അവതാര്‍ സിംഗ് ഖണ്ഡയുടെ മരണം, യുഎസില്‍ ഗുര്‍പത്വന്ത് സിംഗ് പന്നൂനെതിരായ വധശ്രമം എന്നിവയുമായി ബന്ധപ്പെട്ട കേസുകളില്‍ ഇന്ത്യക്ക് പങ്കുണ്ടെന്നാണ് ആരോപണം. ഈ വ്യക്തികളുമായി ബന്ധപ്പെട്ട് ചില സംഭാഷണങ്ങള്‍ നടത്തുന്ന വ്യക്തികള്‍ ‘ഇന്ത്യന്‍ സര്‍ക്കാരിനുവേണ്ടി പ്രവര്‍ത്തിക്കുന്നവരാണെന്ന് ജിസിഎച്ച്ക്യു വിശ്വസിക്കുന്നതായി ഡോക്യുമെന്ററി അവകാശപ്പെടുന്നു. എന്നാല്‍, ഇത്തരം ആരോപണങ്ങള്‍ തെറ്റാണെന്ന് ഇന്ത്യ ആവര്‍ത്തിക്കുന്നുണ്ട്.
ഇന്ത്യ തീവ്രവാദിയായി പ്രഖ്യാപിച്ച ഹര്‍ദീപ് സിംഗ് നിജ്ജാറിനെ 2023 ജൂണില്‍ സറേയില്‍ വെച്ചാണ് വെടിവച്ചുകൊന്നത്. ഈ കൊലപാതകവുമായി ബന്ധപ്പെട്ട അന്വേഷണം നടന്നുകൊണ്ടിരിക്കെ യുകെ ‘അങ്ങേയറ്റം സെന്‍സിറ്റീവ്’ ആയ ചില വിവരങ്ങള്‍ ലഭിച്ചതായി ചൂണ്ടിക്കാട്ടി രംഗത്തെത്തി. കാനഡയ്ക്ക് അതീവ സുരക്ഷയില്‍ മാത്രമേ ഈ വിവരങ്ങള്‍ കൈമാറൂ എന്നും അത് തങ്ങള്‍ക്കുകൂടി വിശ്വസ്തരായ വ്യക്തികളെ മാത്രേ ഈ ഫയലുകള്‍ കാണാന്‍ അനുവദിക്കൂ എന്നും യുകെ വ്യക്തമാക്കിയിരുന്നുവെന്നും ഡോക്യുമെന്ററി പറയുന്നു. നിജ്ജാര്‍, ഖണ്ഡ, പന്നൂന്‍ എന്നീ മൂന്ന് വ്യക്തികളെ ലക്ഷ്യംവെച്ചുള്ള ചിലയാളുകളുടെ സംഭാഷണങ്ങള്‍ തങ്ങള്‍ ചോര്‍ത്തിയെന്നും ആ സംഭാഷണത്തിലെ വിവരങ്ങളായിരുന്നു ഫയലില്‍ എന്നും ഡോക്യുമെന്ററി അവകാശപ്പെട്ടു.
എന്നാല്‍, ആരുടെ സംഭാഷണങ്ങളാണ് ചോര്‍ത്തിയതെന്നോ നിജ്ജാറിന്റെ കൊലയാളികളുടെ പേരോ രേഖയില്‍ പറഞ്ഞിട്ടില്ല. ഇന്ത്യന്‍ ഭരണകൂടം നയിച്ച ഒരു ഓപ്പറേഷനില്‍ അദ്ദേഹം കൊല്ലപ്പെട്ടിരിക്കാനുള്ള ശക്തമായ സാധ്യതയുണ്ടായിരുന്നു,’ ബ്ലൂംബെര്‍ഗ് വീഡിയോയ്ക്കൊപ്പം എഴുതിയ ഒരു ഫീച്ചറില്‍ അവകാശപ്പെട്ടു. നിജ്ജാറിനെ എങ്ങനെ വധിച്ചു എന്നതിനെക്കുറിച്ചുള്ള സംഭാഷണം യുകെ ടാപ്പ് ചെയ്തിരുന്നുവെന്നും ആ വിവരങ്ങളും കനേഡിയന്‍ ഇന്റലിജന്‍സിന് ലഭിച്ചതായും ബ്ലൂംബെര്‍ഗ് ഫീച്ചര്‍ അവകാശപ്പെടുന്നു.
British intelligence agency alleges India’s involvement in Nijjar, Pannun murder conspiracy; Report says information passed on to Canada.
