പ്രശസ്ത ബ്രിട്ടീഷ് നാടകകൃത്തും തിരക്കഥാകൃത്തുമായ ടോം സ്റ്റോപ്പാർഡ് അന്തരിച്ചു. 88 വയസ്സായിരുന്നു. ഇംഗ്ലണ്ടിലെ ഡോർസെറ്റിലെ വീട്ടിലാണ് അദ്ദേഹം അന്ത്യശ്വാസം വെടിഞ്ഞതെന്ന് ബിബിസി റിപ്പോർട്ട് ചെയ്യുന്നു.
സ്റ്റോപ്പാർഡിനെ ഈ കാലഘട്ടത്തിലെ ഏറ്റവും മഹത്തായ നാടകകൃത്തുകളിൽ ഒരാളായാണ് കണക്കാക്കപ്പെടുന്നത്. അറുപത് വർഷത്തിലേറെ നീണ്ട കരിയറിലുടനീളം അദ്ദേഹം അനേകം പ്രശസ്തമായ നാടകങ്ങളും സിനിമാ തിരക്കഥകളും എഴുതി. Rosencrantz and Guildenstern Are Dead, Arcadia, The Real Thing, Leopoldstadt എന്നിവയാണ് പ്രശസ്തമായ കൃതികൾ.
നാടകമേഖലയേക്കാൾ പുറത്തും സ്റ്റോപ്പാർഡ് തന്റെ സാന്നിധ്യം ഉറപ്പിച്ചിരുന്നു റേഡിയോ, ടെലിവിഷൻ, സിനിമ എന്നിവയ്കായും അദ്ദേഹം എഴുതി. 1998-ലെ Shakespeare in Love എന്ന സിനിമയ്ക്ക് മാർക്ക് നോർമനോടൊപ്പം ഓസ്കാർ നേടിയ തിരക്കഥ എഴുതി.തീവ്രബുദ്ധിയും വിനോദവും മാനുഷിക വികാരങ്ങളും സംയോജിപ്പിച്ച അസാധാരണ ശൈലിയാണ് സ്റ്റോപ്പാർഡിന്റെ രചനകളുടെ പ്രത്യേകത. ദാർശനികത, ചരിത്രം, വ്യക്തിത്വം, മനുഷ്യബന്ധങ്ങൾ തുടങ്ങിയ വിഷയങ്ങൾ ഹാസ്യവുമായി കലർത്തി അവതരിപ്പിക്കുന്നതിൽ അദ്ദേഹം പ്രശസ്തനായിരുന്നു.
1937-ൽ ചെക്കോസ്ലോവാക്യയിൽ ജനിച്ച സ്റ്റോപ്പാർഡ്, ബാല്യത്തിൽ നാസി പീഡനത്തിൽ നിന്ന് രക്ഷപ്പെടുകയും പിന്നീട് ബ്രിട്ടനിൽ താമസം തുടരുകയുമായിരുന്നു. അവിടെ വെച്ചാണ് അദ്ദേഹം “ടോം സ്റ്റോപ്പാർഡ്” എന്ന പേര് സ്വീകരിച്ചത്. ബാല്യാനുഭവങ്ങളും വ്യക്തിപരമായ നഷ്ടങ്ങളും പിന്നീട് തന്റെ ജൂത പൈതൃകം തിരിച്ചറിഞ്ഞതും അദ്ദേഹത്തിന്റെ എഴുത്തിനെ ആഴത്തിൽ സ്വാധീനിച്ചിരുന്നു.
2012-ൽ അദ്ദേഹം ലോകത്തിലെ ഏറ്റവും വലിയ സാഹിത്യോത്സവങ്ങളിലൊന്നായ ജയ്പൂർ ലിറ്ററേച്ചർ ഫെസ്റ്റിവലിൽ പങ്കെടുത്തു. അദ്ദേഹത്തിന്റെ സാന്നിധ്യം സാഹിത്യപ്രേമികൾക്കും യുവ എഴുത്തുകാർക്കും ആവേശമായി.
ഫെസ്റ്റിവലിൽ നാടക രചനയുടെ കലയും ചരിത്രവും ദാർശനികതയും നാടകത്തിൽ ഇടപെടുന്ന രീതിയും ചെക്കോസ്ലോവാക്യയിൽ നിന്ന് ബ്രിട്ടനിലേക്ക് നടന്ന തന്റെ ജീവിതയാത്രയും സ്റ്റോപ്പാർഡ് പങ്കുവെച്ചു. സ്റ്റോപ്പാർഡിന്റെ വിടവാങ്ങൽ സാഹിത്യ ലോകത്തിന് വലിയ നഷ്ടമായെന്ന് സഹപ്രവർത്തകരും ആരാധകരും വിലയിരുത്തുന്നു.
British playwright Tom Stoppard dies at 88; attended Jaipur Literature Festival in 2012
