ന്യൂഡല്ഹി : വിദേശ രാജ്യങ്ങളിലെ വിദ്യാഭ്യാസവും ജോലിയുമെല്ലാം ഇന്ത്യന് വിദ്യാര്ത്ഥികളില് നല്ലൊരു ശതമാനത്തിനും പ്രിയപ്പെട്ടതാണ്. കുടിയേറ്റക്കാര്ക്കും വിദ്യാര്ത്ഥികള്ക്കും തൊഴിലാളികള്ക്കും ലോകത്തിലെ ഏറ്റവും സ്വാഗതാര്ഹമായ സ്ഥലങ്ങളിലൊന്നായ കാനഡയില് കാര്യങ്ങള് മാറിമറിയുന്നു.
2025 ജനുവരി മുതല് ഏപ്രില് വരെയുള്ള കാലയളവില് വിദ്യാര്ത്ഥി വിസ അപേക്ഷകളില് 43% ഉം വര്ക്ക് പെര്മിറ്റ് അഭ്യര്ത്ഥനകളില് 69% ഉം മാത്രമേ അംഗീകരിച്ചിട്ടുള്ളൂ എന്ന് ഇമിഗ്രേഷന്, റെഫ്യൂജീസ് ആന്ഡ് സിറ്റിസണ്ഷിപ്പ് കാനഡ (IRCC) യില് നിന്നുള്ള പുതിയ ഡാറ്റ വ്യക്തമാക്കുന്നു. ഇത് വിദേശ വിദ്യാര്ത്ഥികളില് ഒരു ആശങ്കാജനകമായ സ്ഥിതിയാണ് സൃഷ്ടിച്ചിരിക്കുന്നത്.
വര്ഷങ്ങളായി, അന്താരാഷ്ട്ര വിദ്യാര്ത്ഥികള് കാനഡയുടെ വളര്ച്ചയില് കേന്ദ്രബിന്ദുവാണ്, ട്യൂഷന് വരുമാനം വര്ദ്ധിപ്പിക്കുകയും, തൊഴില് മേഖലയെ ശക്തിപ്പെടുത്തുകയും, അതിന്റെ സാംസ്കാരിക ഘടനയെ സമ്പന്നമാക്കുകയും ചെയ്യുന്നു. അതുപോലെ, പ്രധാന വ്യവസായങ്ങളിലെ തൊഴില് ക്ഷാമം പരിഹരിക്കുന്നതില് വിദേശ തൊഴിലാളികള് നിര്ണായക പങ്ക് വഹിച്ചിട്ടുണ്ട്. എന്നിരുന്നാലും, ഏറ്റവും പുതിയ വിദ്യാര്ത്ഥി വിസാ, വര്ക്ക് പെര്മിറ്റ് അംഗീകാര നിരക്കുകള് ഇനിയങ്ങോട്ട് കാനഡയിലേക്കുള്ള പ്രവേശനത്തെ പരിമിതപ്പെടുത്തുന്നുവെന്നാണ് വ്യക്തമാക്കുന്നത്.
എന്തുകൊണ്ടാണ് ഈ കടുത്ത സൂക്ഷ്മപരിശോധന?
വിദ്യാര്ത്ഥി വിസക്കായി 182,404 അപേക്ഷകളില്, 2025 ലെ ആദ്യ നാല് മാസങ്ങളില് 78,620 പേര്ക്ക് മാത്രമാണ് പ്രവേശനം ലഭിച്ചത്. എന്താണ് സംഭവിക്കുന്നതെന്ന ചോദ്യത്തിനുള്ള പ്രധാന ഉത്തരം വിദ്യാര്ത്ഥികളുടെ അഭൂതപൂര്വമായ ഒഴുക്കാണ്. ഇത്രയധികം വിദ്യാര്ത്ഥികള് കാനഡയിലേക്കെത്തുമ്പോള് അവരെ സ്വീകരിക്കാനുള്ള പരിതസ്ഥിതികള് കുറവാണ്. സമീപ വര്ഷങ്ങളില്, കോളേജുകള്ക്കു സമീപവും നഗര പ്രദേശങ്ങളിലുമെല്ലാം ഭവന ക്ഷാമം റിപ്പോര്ട്ട് ചെയ്യുന്നുണ്ട്. ബിരുദധാരികള്ക്കിടയില് തൊഴിലില്ലായ്മയും ഇതിനിടയിലെ വെല്ലുവിളിയാണ്. കാനഡയില് സ്ഥിര താമസത്തിലേക്കുള്ള സുഗമമായ പാതയായി ഒരിക്കല് കണക്കാക്കപ്പെട്ടിരുന്ന ‘വിദ്യാര്ത്ഥി മാര്ഗം’ ഇപ്പോള് അമിത ഭാരമാണ് സൃഷ്ടിക്കുന്നത്.
കാനഡയില് അക്കാദമികമായും സാമ്പത്തികമായും പ്രൊഫഷണലായും വിജയിക്കാന് ഏറ്റവും സാധ്യതയുള്ളതായി കരുതപ്പെടുന്ന വിദ്യാര്ത്ഥികള്ക്ക് മാത്രമാണ് കാനഡ മികച്ച ഇടമായി മാറുക.
