ന്യൂഡല്‍ഹി : കാനഡയുടെ മണ്ണില്‍നിന്ന് ഇന്ത്യയ്‌ക്കെതിരെ പടയൊരുക്കം നടത്താന്‍ ഖലിസ്ഥാന്‍ ഭീകരവാദികള്‍ ആസൂത്രണം ചെയ്യുന്നുവെന്നു കനേഡിയന്‍ സെക്യൂരിറ്റി ഇന്റലിജന്‍സ് സര്‍വീസ് (സിഎസ്‌ഐഎസ്) റിപ്പോര്‍ട്ട്.
കാനഡയുടെ ദേശീയ താല്‍പര്യത്തിനു ഇത് ഭീഷണിയാകുന്നുവെന്നും റിപ്പോര്‍ട്ടില്‍ പറയുന്നു. ഖലിസ്ഥാന്‍ ഭീകരര്‍ക്കെതിരെ ആദ്യമായാണു കാനഡ ഇത്തരത്തില്‍ പ്രതികരിക്കുന്നത്. സ്വതന്ത്രരാജ്യം ലക്ഷ്യമിട്ടുള്ള പ്രവര്‍ത്തനങ്ങളും ധനസമാഹരണവുമെല്ലാം ഇവര്‍ കാനഡ കേന്ദ്രീകരിച്ചു നടത്തുന്നുവെന്നും കനേഡിയന്‍ രഹസ്യാന്വേഷണ ഏജന്‍സിയുടെ 2024 വാര്‍ഷിക റിപ്പോര്‍ട്ടില്‍ പറയുന്നു.
1980 മുതല്‍ ഇവര്‍ പ്രവര്‍ത്തിക്കുന്നുണ്ടെന്നും റിപ്പോര്‍ട്ടിലുണ്ട്. ഖലിസ്ഥാന്‍ നേതാവ് ഹര്‍ദീപ് സിങ് നിജ്ജറിന്റെ വധത്തെത്തുടര്‍ന്നു വിള്ളല്‍ വീണ ഇന്ത്യ-കാനഡ ബന്ധം വീണ്ടും സൗഹൃദവഴിയില്‍ എത്തുന്നതിന്റെ സൂചന കാനഡയില്‍ നടന്ന ജി7 സമ്മേളനത്തില്‍ മോദിയുടെ സന്ദര്‍ശനത്തിനു പിന്നാലെ ലഭിച്ചിരുന്നു. ഇതിനു പിന്നാലെയാണ് റിപ്പോര്‍ട്ട് പ്രസിദ്ധീകരിച്ചത്.
ഇത് റിപ്പോര്‍ട്ടില്‍ത്തന്നെയാണ് ഇന്ത്യ കാനഡയില്‍ സ്വാധീനം ചെലുത്തുന്നുവെന്നും, ചില ഇടപെടലുകള്‍ നടത്തുവെന്നതുമായ പരാമര്‍ശങ്ങളുമുള്ളത്.
