തിരുവനന്തപുരം : മുഖ്യമന്ത്രി പിണറായി വിജയന്‍ സൗദി അറേബ്യ സന്ദര്‍ശിക്കാനൊരുങ്ങുന്നു. ഔദ്യോഗിക ആവശ്യങ്ങള്‍ക്കായാണ് മുഖ്യമന്ത്രിയുടെ യാത്ര. ഈ മാസം 17 മുതല്‍ 19 വരെയാണ് മുഖ്യമന്ത്രിയുടെ സന്ദര്‍ശനം. ഈ മാസം 16 ന് ബഹ്‌റൈനിലേക്ക് പോകുന്ന മുഖ്യമന്ത്രി, ബഹ്‌റൈനിലെ ഏകദിന സന്ദര്‍ശനത്തിനു ശേഷമാണ് സൗദിയിലേക്ക് തിരിക്കുക. സൗദിയിലെ വിവിധ പരിപാടികളില്‍ മുഖ്യമന്ത്രി പങ്കെടുക്കും. സാംസ്‌കാരിക മന്ത്രി സജി ചെറിയാന്‍, മറ്റു മന്ത്രിമാര്‍, നോര്‍ക്ക ഡയറക്ടര്‍ ബോര്‍ഡ് അംഗങ്ങള്‍ എന്നിവരും മുഖ്യമന്ത്രിക്കൊപ്പമുണ്ടാകും.
കേരളാ സര്‍ക്കാരിന്റെ മലയാളം മിഷന്‍ സൗദി ചാപ്റ്ററിന്റെ ‘മലയാളോത്സവം’ പൊതു പരിപാടിയില്‍ സംബന്ധിക്കാനാണ് മുഖ്യമന്ത്രി എത്തുന്നത്. ദമാം, റിയാദ്, ജിദ്ദ എന്നിവിടങ്ങളില്‍ സംഘടിപ്പിക്കുന്ന ‘മലയാളോത്സവ’ത്തില്‍ അദ്ദേഹം പങ്കെടുക്കും. മലയാള ഭാഷാ പഠനത്തിനും പ്രചരണത്തിനുമായി ആഗോള തലത്തില്‍ പ്രവര്‍ത്തിക്കുന്ന സംവിധാനമാണ് കേരള സര്‍ക്കാരിന്റെ മലയാളം മിഷന്‍. മുഖ്യമന്ത്രിയായതിനുശേഷം ആദ്യമായാണ് പിണറായി സൗദി സന്ദര്‍ശിക്കുന്നത്. ഈ മാസം 17 ന് ദമാമിലും, 18 ന് ജിദ്ദയിലും, 19 ന് റിയാദിലുമാണ് ‘മലയാളോത്സവം’ നടക്കുന്നത്.
