ബെയ്ജിങ്: രാജ്യത്ത് ജനനനിരക്ക് കൂട്ടാനുള്ള പുതിയ പദ്ധതിയുമായി ചൈനീസ് സർക്കാർ. ജനനനിരക്ക് കുറയുന്ന സാഹചര്യത്തിലാണ് തിങ്കളാഴ്ച ഈ പുതിയ പദ്ധതി സർക്കാർ പ്രഖ്യാപിച്ചിരിക്കുന്നത്. കുട്ടികളെ വളർത്താൻ രക്ഷിതാക്കൾക്ക് ധനസഹായം സർക്കാർ വാഗ്ദാനം ചെയ്തു. ഓരോ കുട്ടിക്കും 3600 യുവാൻ ( 43,500 രൂപ ) വാർഷിക ധനസഹായമായി നൽകും. കുട്ടിക്ക് മൂന്നുവയസ് തികയും വരെ ഈ സഹായം രക്ഷിതാക്കൾക്ക് ലഭിക്കുകയും ചെയ്യും. പദ്ധതി ഏകദേശം 20 ദശലക്ഷം രക്ഷിതാക്കൾക്ക് ഗുണം ചെയ്യുമെന്നാണ് റിപ്പോർട്ടുകൾ.
കുട്ടികളുടെ സംരക്ഷണത്തിനും വിദ്യാഭ്യാസത്തിനുമുള്ള ഉയർന്ന ചെലവുകൾ, ജോലിയിലെ അനിശ്ചിതത്വം എന്നിവ കാരണം നിരവധി ചൈനീസ് യുവജനങ്ങൾ വിവാഹം കഴിച്ച് കുടുംബം തുടങ്ങുന്നതിൽ നിന്ന് മാറി നിൽക്കുന്നുവെന്നാണ് വിലയിരുത്തലുകൾ. ചൈനയിൽ 2023 മുതലിങ്ങോട്ട് ജനസംഖ്യ കുറഞ്ഞതായും ഔദ്യോഗിക കണക്കുകൾ പറയുന്നു.ജനനനിരക്ക് വർധിപ്പിക്കുന്നതിനുള്ള സർക്കാരിന്റെ പുതിയ ശ്രമം ഉടൻതന്നെ മുൻകാല പ്രാബല്യത്തോടെ നടപ്പിലാക്കും.
2022-നും 2024-നും ഇടയിൽ ജനിച്ച കുട്ടികളുള്ള കുടുംബങ്ങൾക്ക് ആനുകൂല്യത്തിന് അപേക്ഷിക്കാം. അതേസമയം, ഇപ്പോൾ പ്രഖ്യാപിച്ചിരിക്കുന്ന തുക വളരെ ചെറുതാണെന്നാണ് ക്യാപിറ്റൽ ഇക്കണോമിക്സിലെ സാമ്പത്തിക വിദഗ്ധനായ സിചുൻ ഹുവാങ് പറയുന്നത്.
