തിരുവനന്തപുരം: എസ്എഫ്ഐ പ്രവർത്തകർ രാജ്‌ഭവനിലേക്ക് നടത്തിയ പ്രതിഷേധ മാർച്ചിൽ സംഘർഷം. എസ്എഫ്ഐ സംസ്ഥാന കമ്മിറ്റിയുടെ നേതൃത്വത്തിലായിരുന്നു പ്രതിഷേധ മാർച്ച് സംഘടിപ്പിച്ചത്. ‘സംഘി വിസി അറബിക്കടലിൽ’ എന്ന ബാനറും ഉയർത്തി നടത്തിയ മാർച്ച് പോലീസ് തടഞ്ഞതോടെ സംഘർഷഭരിതമായി. തുടർന്ന് പ്രവർത്തകർക്കുനേരെ പോലീസ് ജലപീരങ്കി പ്രയോഗിച്ചു.
വഴിതടയുന്നതിനായി പോലീസ് സ്ഥാപിച്ചിരുന്ന ബാരിക്കേഡുകൾ മറിച്ചിട്ട് അതിന് മുകളിൽ കയറിനിന്നും പ്രവർത്തകർ മുദ്രാവാക്യം വിളിച്ചു. ആറുതവണ പോലീസ് ജലപീരങ്കി പ്രയോഗിച്ചു. സംഭരിച്ച വെള്ളം തീർന്നതോടെ പോലീസ് പ്രതിരോധത്തിലായി. പ്രവർത്തകർ രാജ്‌ഭവനിലേക്ക് അതിക്രമിച്ച് കയറാൻ ശ്രമിച്ചതോടെ പോലീസ് ടിയർ ഗ്യാസ് പ്രയോഗിക്കുമെന്ന മുന്നറിയിപ്പ് നൽകിയെങ്കിലും പ്രവർത്തകർ സ്ഥലംവിട്ടുപോകാൻ തയ്യാറായിട്ടില്ല. ഇപ്പോഴും സ്ഥലത്ത് സംഘർഷാവസ്ഥ തുടരുകയാണ്.
അതേസമയം, എഐഎസ്എഫ് ഡിവൈഎഫ്ഐ പ്രവർത്തകരുടെ പ്രതിഷേധം കേരള സർവകലാശാലയിൽ നടന്നിരുന്നു . വി സി മോഹനൻ കുന്നുമ്മൽ എത്തുന്നതിന് മുന്നോടിയായാണ് പ്രതിഷേധം ഉണ്ടായത്. പ്രവർത്തകരും പൊലീസും തമ്മിൽ ഉന്തും തള്ളുമുണ്ടായതോടെ പൊലീസ് ജലപീരങ്കി പ്രയോഗിച്ചു. പിന്മാറാൻ തയ്യാറാകാത്തതിനെ തുടർന്ന് എഐഎസ്എഫ് പ്രവർത്തകരെ പൊലീസ് അറസ്റ്റ് ചെയ്ത് നീക്കി.
