ന്യൂഡൽഹി: ആണവോർജ മേഖലയിൽ സ്വകാര്യ പങ്കാളിത്തം അനുവദിക്കുന്നതും പഴയ നിയമങ്ങൾ റദ്ദാക്കുന്നതുമായ ശാന്തി (SHANTHI) ബിൽ (Sustainable Harnessing and Advancement of Nuclear Energy for Transforming India Bill, 2025) പാർലമെന്റിൽ തിരക്കിട്ട് പാസാക്കിയതിനെതിരെ കോൺഗ്രസ് നേതാവ് ജയറാം രമേശ് രൂക്ഷ വിമർശനം ഉന്നയിച്ചു. യുഎസ് പ്രസിഡന്റ് ഡൊണാൾഡ് ട്രംപ് ഒപ്പുവെച്ച എൻഡിഎഎ (NDAA 2026)യിൽ ഇന്ത്യയുടെ ആണവ ബാധ്യത നിയമങ്ങൾ സംബന്ധിച്ച യുഎസ്-ഇന്ത്യ സംയുക്ത വിലയിരുത്തൽ പരാമർശിച്ചതിന് പിന്നാലെയാണ് ഈ ആരോപണം. പ്രധാനമന്ത്രി നരേന്ദ്ര മോദി തന്റെ ‘പഴയ സുഹൃത്തുമായി ശാന്തി പുനഃസ്ഥാപിക്കാൻ’ വേണ്ടിയാണ് ബിൽ അടിയന്തരമായി പാസാക്കിയതെന്ന് ജയറാം രമേശ് എക്സ് പോസ്റ്റിലൂടെ ആരോപിച്ചു. ബില്ലിനെ ‘TRUMP Act’ (The Reactor Use and Management Promise Act) എന്ന് വിളിക്കാമെന്നും അദ്ദേഹം പരിഹസിച്ചു.
ശാന്തി ബിൽ ആറ്റോമിക് എനർജി ആക്ട് 1962ഉം സിവിൽ ലയബിലിറ്റി ഫോർ ന്യൂക്ലിയർ ഡാമേജ് ആക്ട് 2010ഉം റദ്ദാക്കി പുതിയ ചട്ടക്കൂട് രൂപീകരിക്കുന്നു. ഇത് ആണവോർജ മേഖലയിൽ ഇന്ത്യൻ സ്വകാര്യ കമ്പനികൾക്കും ജോയിന്റ് വെഞ്ചേഴ്സിനും പങ്കാളിത്തം അനുവദിക്കുന്നു. പ്രതിപക്ഷം ബില്ലിനെതിരെ ശക്തമായ എതിർപ്പ് പ്രകടിപ്പിച്ചിരുന്നു. സുരക്ഷാ ആശങ്കകളും വിതരണക്കാരുടെ ബാധ്യത നീക്കം ചെയ്യുന്നതും ചൂണ്ടിക്കാട്ടി ബിൽ പാർലമെന്ററി സമിതിക്ക് വിടണമെന്ന് ആവശ്യപ്പെട്ടെങ്കിലും അത് നിരസിക്കപ്പെട്ടു. ലോക്സഭയ്ക്ക് പിന്നാലെ രാജ്യസഭയും ശബ്ദവോട്ടോടെ ബിൽ പാസാക്കി.
സർക്കാർ ബില്ലിനെ ‘പരിവർത്തന നിമിഷം’ എന്ന് വിശേഷിപ്പിക്കുമ്പോൾ പ്രതിപക്ഷം ഇതിനെ വിതരണക്കാരന്റെ താൽപ്പര്യങ്ങൾ സംരക്ഷിക്കുന്നതായി വിമർശിക്കുന്നു. യുഎസ് നിയമത്തിലെ പരാമർശം ബില്ലിന്റെ തിരക്കിട്ടുള്ള പാസാക്കലിന്റെ യഥാർത്ഥ കാരണം വെളിപ്പെടുത്തുന്നുവെന്ന് ജയറാം രമേശ് ആരോപിച്ചു. ഇന്ത്യയുടെ ആണവോർജ ശേഷി വർധിപ്പിക്കാനുള്ള ലക്ഷ്യങ്ങൾക്ക് പിന്നിൽ വിദേശ താൽപ്പര്യങ്ങൾ പ്രവർത്തിക്കുന്നുവെന്ന ആശങ്കയും ഉയരുന്നുണ്ട്.
