ന്യൂഡല്‍ഹി : ദക്ഷിണാഫ്രിക്കയില്‍ നടക്കുന്ന ജി 20 ഉച്ചകോടിയില്‍ പങ്കെടുക്കില്ലെന്ന് യുഎസ് പ്രസിഡന്റ് ഡോണള്‍ഡ് ട്രംപ് പ്രഖ്യാപിച്ചതിന് പിന്നാലെ പ്രധാനമന്ത്രി നരേന്ദ്ര മോദിയെ പരിഹസിച്ച് കോണ്ഗ്രസ്. വ്യാപാര ചര്‍ച്ചയടക്കം അനിശ്ചിതമായി നീണ്ടുപോകുന്ന സാഹചര്യമടക്കം പരിഗണിച്ച് ട്രംപുമായുള്ള കൂടിക്കാഴ്ച ഒഴിവാക്കാന്‍ ജി20ക്ക് മോദി പങ്കെടുക്കില്ലെന്ന റിപ്പോര്‍ട്ടുകള്‍ കഴിഞ്ഞ ദിവസം വന്നിരുന്നു. എന്നാല്‍ ട്രംപ് വിട്ടു നില്‍ക്കുമെന്ന് അറിയിച്ചതിനു പിന്നാലെ ഇനി മോദി പങ്കെടുക്കുമെന്ന് പരിഹസിച്ചാണ് കോണ്ഗ്രസ് നേതാവ് ജയറാം രമേശ് രംഗത്തെത്തിയത്.
‘സ്വയം പ്രഖ്യാപിത വിശ്വഗുരു’ എന്നാണ് മോദിയെ ജയറാം രമേശ് പരാമര്‍ശിച്ചത്. മോദി വരാനിരിക്കുന്ന ജി 20 ഉച്ചകോടിയില്‍ നേരിട്ട് പങ്കെടുക്കുമെന്നും അദ്ദേഹം പരോക്ഷമായി പരിഹസിച്ചു. ‘നവംബര്‍ 22, 23 തീയതികളില്‍ ദക്ഷിണാഫ്രിക്കയില്‍ നടക്കുന്ന ജി 20 ഉച്ചകോടിയില്‍ പങ്കെടുക്കില്ലെന്ന് പ്രസിഡന്റ് ട്രംപ് പ്രഖ്യാപിച്ചതോടെ, സ്വയം പ്രഖ്യാപിത വിശ്വഗുരു നേരിട്ട് പങ്കെടുക്കുമെന്ന് നമുക്ക് ഉറപ്പിക്കാം,’ ജയറാം രമേശ് എക്സിലെ ഒരു പോസ്റ്റില്‍ പറഞ്ഞു.
2014-ല്‍ പ്രധാനമന്ത്രിയായതിനുശേഷം, ബ്രിസ്ബേന്‍, അന്റാലിയ, ഹാങ്ഷൗ, ഹാംബര്‍ഗ്, ബ്യൂണസ് അയേഴ്സ്, ഒസാക്ക, റിയാദ് (കോവിഡ് കാരണം വെര്‍ച്വല്‍), റോം, ബാലി, ന്യൂഡല്‍ഹി എന്നിവിടങ്ങളിലെ എല്ലാ ജി 20 ഉച്ചകോടികളിലും പ്രധാനമന്ത്രി മോദി പങ്കെടുത്തിട്ടുണ്ട്.
ദക്ഷിണാഫ്രിക്കയിലെ വെള്ളക്കാരായ കര്‍ഷകര്‍ക്കെതിരായി ‘മനുഷ്യാവകാശ ലംഘനങ്ങള്‍’ നടക്കുന്നുവെന്ന് ചൂണ്ടിക്കാട്ടിയാണ് യുഎസ് ഉച്ചകോടിയില്‍ പങ്കെടുക്കില്ലെന്ന് ട്രംപ് പ്രഖ്യാപിച്ചത്. ഇതിനു പിന്നാലെയാണ് മുതിര്‍ന്ന കോണ്ഗ്രസ് നേതാവിന്റെ പരാമര്‍ശം.
”ഞാന്‍ പോകുന്നില്ല. ദക്ഷിണാഫ്രിക്കയില്‍ ഞങ്ങള്‍ക്ക് ഒരു ജി20 മീറ്റിംഗ് ഉണ്ട്.
ദക്ഷിണാഫ്രിക്ക ഇനി ജിഎസില്‍ പോലും ഉണ്ടാകരുത്, കാരണം അവിടെ സംഭവിച്ചത് മോശമാണ്. പോകില്ലെന്ന് ഞാന്‍ അവരോട് പറഞ്ഞു. ഞാന്‍ അവിടെ നമ്മുടെ രാജ്യത്തെ പ്രതിനിധീകരിക്കാന്‍ പോകുന്നില്ല. അത് അവിടെ ഉണ്ടാകരുത്”- ബുധനാഴ്ച മയാമിയില്‍ നടന്ന അമേരിക്ക ബിസിനസ് ഫോറത്തില്‍ ട്രംപ് പറഞ്ഞു.
അര്‍ജന്റീന, ഓസ്ട്രേലിയ, ബ്രസീല്‍, കാനഡ, ചൈന, ഫ്രാന്‍സ്, ജര്‍മ്മനി, ഇന്ത്യ, ഇന്തോനേഷ്യ, ഇറ്റലി, ജപ്പാന്‍, ദക്ഷിണ കൊറിയ, മെക്‌സിക്കോ, റഷ്യ, സൗദി അറേബ്യ, ദക്ഷിണാഫ്രിക്ക, തുര്‍ക്കി, യുണൈറ്റഡ് കിംഗ്ഡം, യുണൈറ്റഡ് സ്റ്റേറ്റ്‌സ് എന്നീ 19 രാജ്യങ്ങളും യൂറോപ്യന്‍ യൂണിയനും ആഫ്രിക്കന്‍ യൂണിയനും ഉള്‍പ്പെടുന്നതാണ് ജി20. 2024 ഡിസംബര്‍ 1 ന് ദക്ഷിണാഫ്രിക്ക ഒരു വര്‍ഷം നീണ്ടുനില്‍ക്കുന്ന ജി20 പ്രസിഡന്റ് സ്ഥാനം ഏറ്റെടുത്തു. നവംബര്‍ 22 മുതല്‍ 23 വരെ ജോഹന്നാസ്ബര്‍ഗില്‍ നടക്കുന്ന ഒരു ഉച്ചകോടി യോഗത്തിന് ആതിഥേയത്വം വഹിക്കും. ആഫ്രിക്കന്‍ മണ്ണില്‍ ആദ്യമായാണ് ജി20 ഉച്ചകോടി നടക്കുന്നത്. 2022 ഡിസംബര്‍ മുതല്‍ 2023 നവംബര്‍ വരെ ഇന്ത്യ ജി20 യുടെ പ്രസിഡന്റായിരുന്നു, 2023 സെപ്റ്റംബറില്‍ ന്യൂഡല്‍ഹിയില്‍ 18-ാമത് ജി20 ഉച്ചകോടിക്ക് ആതിഥേയത്വം വഹിച്ചു. ജി20 ഉച്ചകോടിയില്‍ പങ്കെടുക്കാന്‍ അന്നത്തെ യുഎസ് പ്രസിഡന്റ് ജോ ബൈഡന്‍ ഇന്ത്യയിലേക്ക് എത്തിയിരുന്നു. ഇന്ത്യയുടെ ജി20 പ്രസിഡന്‍സിക്ക് കീഴിലാണ് ആഫ്രിക്കന്‍ യൂണിയന്‍ ലോകത്തിലെ പ്രധാന സമ്പദ്വ്യവസ്ഥകളുടെ ഗ്രൂപ്പിംഗില്‍ സ്ഥിരാംഗമായി ഔദ്യോഗികമായി ചേര്‍ന്നത്.
Congress has mocked Prime Minister Narendra Modi after US President Donald Trump announced that he will not attend the G20 summit in South Africa.
