ന്യൂഡൽഹി: ലോറൻസ് ബിഷ്ണോയ് സംഘത്തലവൻ അൻമോൽ ബിഷ്ണോയിക്ക് പാക്കിസ്ഥാനിലെ അധോലോക കുറ്റവാളി ഷെഹ്സാദ് ഭട്ടിയിൽനിന്ന് വധഭീഷണി ലഭിച്ചതായി വെളിപ്പെടുത്തൽ. എൻഐഎ കസ്റ്റഡിയിലുള്ള അൻമോൽ നവംബർ 27-ന് ഡൽഹി കോടതിയിൽ സമർപ്പിച്ച ഹർജിയിൽ പ്രത്യേക സുരക്ഷയും ബുള്ളറ്റ് പ്രൂഫ് ജാക്കറ്റും വാഹനവും ആവശ്യപ്പെട്ടു. ‘‘ഞാനും കുടുംബവും ഭയന്നാണ് ജീവിക്കുന്നത്. ഓൺലൈൻ ഭീഷണികൾ പലപ്പോഴും യഥാർഥ ആക്രമണങ്ങളിലേക്ക് നയിക്കാറുണ്ട്’’ എന്ന് ഹർജിയിൽ അൻമോൽ വ്യക്തമാക്കി.
എൻഐഎ ആസ്ഥാനത്ത് നിന്ന് കോടതിയിലേക്ക് കൊണ്ടുപോകുമ്പോൾ കർശന സുരക്ഷയും വിശദമായ പരിശോധനയും വേണമെന്നാണ് പ്രധാന ആവശ്യം. യുഎസിൽ നിന്ന് നാടുകടത്തപ്പെട്ട് നവംബർ 19-ന് ഇന്ത്യയിലെത്തിച്ച അൻമോലിന്റെ കസ്റ്റഡി കാലാവധി എൻഐഎ സ്പെഷ്യൽ ജഡ്ജി പ്രശാന്ത് ശർമ ഡിസംബർ 5 വരെ നീട്ടി. ബാബാ സിദ്ദിഖി കൊലപാതകം, സിദ്ദു മൂസവാല കേസ്, സൽമാൻ ഖാൻ വീട്ടിലേക്കുള്ള വെടിവയ്പ്പ് തുടങ്ങിയ ഗുരുതര കേസുകളിൽ പ്രതിയാണ് അൻമോൽ.
അൻമോലിനെ പിടികൂടുന്നവർക്ക് 10 ലക്ഷം രൂപ പ്രതിഫലം എൻഐഎ പ്രഖ്യാപിച്ചിരുന്നു. പാക്കിസ്ഥാൻ ആസ്ഥാനമായുള്ള ഷെഹ്സാദ് ഭട്ടിയുമായുള്ള ശത്രുത പശ്ചാത്തലത്തിൽ ഓൺലൈനിലൂടെ വധഭീഷണി ലഭിച്ചതായി അൻമോൽ ആവർത്തിച്ചു. ഭീഷണി ഗൗരവമായി കണക്കാക്കിയ കോടതി എൻഐഎയോട് വിശദീകരണം തേടി.
