ന്യൂഡല്ഹി: രാജ്യതലസ്ഥാനത്തെ വായു ഗുണനിലവാരം വീണ്ടും താഴ്ന്നുതുടങ്ങിയെന്ന് റിപ്പോര്ട്ട്. ശൈത്യകാല തണുപ്പ് ആരംഭിച്ചതോടെ, നഗരം വീണ്ടും വായു മലിനീകരണത്തിലേക്ക് നീങ്ങുകയാണ്. ശനിയാഴ്ച വായു ഗുണനിലവാര സൂചിക (എക്യുഐ) 199 ആയിരുന്നു, ഇത് ‘മോശം’ വിഭാഗത്തില് നിന്ന് വളരെ ചെറിയ അകലംമാത്രമാണ് പാലിക്കുന്നത്.
വൈകുന്നേരം 4 മണിക്ക് ഡല്ഹിയിലെ എയര് ക്വാളിറ്റി ഇന്ഡക്സ് ‘മിതമായ’ വിഭാഗത്തില് 199 ആയി രേഖപ്പെടുത്തി. 201 നും 300 നും ഇടയിലുള്ള എയര് ക്വാളിറ്റി ഇന്ഡക്സ് ‘മോശം’ വിഭാഗത്തില് പെടുന്നു. ലഭ്യമാകുന്ന വിവരങ്ങള് പ്രകാരം ദേശീയ തലസ്ഥാനം അവസാനമായി ജൂണിലാണ് ‘മോശം’ എയര് ക്വാളിറ്റി ഇന്ഡക്സ് രേഖപ്പെടുത്തിയത്. ഡല്ഹിയിലെ മലിനീകരണത്തിന് ഏറ്റവും വലിയ കാരണമാകുന്നത് ഗതാഗത മേഖലയാണ്, മൊത്തം ഉദ്വമനത്തിന്റെ 17.9 ശതമാനമാണിതെന്ന് ഡിസിഷന് സപ്പോര്ട്ട് സിസ്റ്റത്തിന്റെ (ഡിഎസ്എസ്) ഡാറ്റ കാണിക്കുന്നു.
അതേസമയം, കര്ഷകര് വൈക്കോല് കത്തിക്കുന്ന സംഭവങ്ങള് ശനിയാഴ്ച ഉപഗ്രഹ ഡാറ്റയില് കണ്ടെത്തിയിട്ടുണ്ട്. പഞ്ചാബ്, ഹരിയാന, യുപി-എന്സിആര് മേഖലയില് നിന്നായാണ് ഇവ റിപ്പോര്ട്ട് ചെയ്തത്. സിപിസിബിയുടെ കണക്കനുസരിച്ച്, പൂജ്യത്തിനും 50 നും ഇടയിലുള്ള വായു ഗുണനിലവാര സൂചിക ‘നല്ലത്’, 51 മുതല് 100 വരെ ‘തൃപ്തികരമാണ്’, 101 മുതല് 200 വരെ ‘മിതമായത്’, 201 മുതല് 300 വരെ ‘മോശം’, 301 മുതല് 400 വരെ ‘വളരെ മോശം’, 401 മുതല് 500 വരെ ‘ഗുരുതരം’ എന്നിങ്ങനെയാണ് കണക്കാക്കുന്നത്
