2013ൽ പുറത്തിറങ്ങിയ ധനുഷ് നായകനായ ബോളിവുഡ് ചിത്രം റാഞ്ചനായുടെ ക്ലൈമാക്സ് AI യുടെ സഹായത്തോടെ മാറ്റം വരുത്തി പ്രദർശിപ്പിച്ച സംഭവത്തിൽ പ്രതിഷേധമറിയിച്ച് ധനുഷ്. ആനന്ദ് എൽ റായിയുടെ സംവിധാനത്തിനാലാണ് ചിത്രം ഒരുങ്ങിയത്. തന്റെ എക്സ് അക്കൗണ്ടിൽ പങ്കുവെച്ച കുറിപ്പിലൂടെയാണ് ധനുഷ് തന്റെ പ്രതിഷേധം അറിയിച്ചത്.
സിനിമയോടുള്ള സ്നേഹത്താൽ… എന്ന ശീർഷകത്തോടെ ആരംഭിച്ച കുറിപ്പിൽ, AI ഉപയോഗിച്ച് ക്ലൈമാക്സിൽ മാറ്റം വരുത്തിയ റാഞ്ചനയുടെ പുതിയ പതിപ്പ് എന്നെ വളരെയധികം അലോസരപ്പെടുത്തി, പുതിയ ക്ലൈമാക്സ് ചിത്രത്തിൽ നിന്ന് അതിന്റെ ആത്മാവിനെ തന്നെ നഷ്ടപ്പെടുത്തി. ഞാൻ എതിർപ്പ് പ്രകടിപ്പിച്ചിട്ടും അവർ ആ നീക്കവുമായി അവർ മുന്നോട്ട് പോയി. 12 കൊല്ലം മുൻ ഞാൻ ഭാഗമായ സിനിമയേയല്ലയിതെന്ന് ധനുഷ് പറഞ്ഞു.
ധനുഷിന്റെ ബോളിവുഡ് അരങ്ങേറ്റ ചിത്രമായ റാഞ്ചനയിൽ നോർത്ത് ഇന്ത്യയിലേക്ക് കുടിയേറിയ ഒരു തമിഴ് പയ്യന് അവിടെ ഒരു പെൺകുട്ടിയോട് കുട്ടിക്കാലം മുതൽ തോന്നുന്ന പ്രണയവും തുടർന്നുള്ള സംഭവവികാസങ്ങളുമാണ് കാണിക്കുന്നത്. സംഭവബഹുലമായ കഥാഗതിയിൽ ധനുഷിന്റെ കഥാപാത്രം മരണമടയുകയും ഒരു ദുഃഖപര്യവസായിയായി ചിത്രം അവസാനിക്കുന്നതുമാണ് കാണിക്കുന്നത്. ഈ ക്ലെെമാക്സ് ഏറെ വേദനാജനകമായതിനാലാണ് ധനുഷ് മരിക്കാതെ ഉണർന്നു എഴുന്നേറ്റ് പോകുന്ന മറ്റൊരു ക്ലൈമാക്സ് ചിലർ ഒരുക്കിയത്. ഈ പ്രവൃത്തി സിനിമയോട് കാണിക്കുന്ന ചതിയാണ് എന്നാണ് ചിത്രത്തിന്റെ സംവിധായകൻ ആനന്ദ് എൽ. റായ് സംഭവത്തിൽ പ്രതികരിച്ചത്.
