ഉഡുപ്പി: ധർമ്മസ്ഥല ആക്ഷൻ കൗൺസിൽ ചെയർമാനും സൗജന്യ പ്രചാരണ പ്രവർത്തകനുമായ മഹേഷ് ഷെട്ടി തിമ്മരോടിയെ ഉഡുപ്പി ബ്രഹ്മാവർ പൊലീസ് അറസ്റ്റ് ചെയ്തു. ബിജെപി ദേശീയ ജനറൽ സെക്രട്ടറി ബി.എൽ. സന്തോഷിനെതിരെ അപകീർത്തികരമായ പ്രസ്താവന നടത്തിയെന്ന കേസിൽ ഉജ്ജിരെയിലെ വീട്ടിൽ നിന്നാണ് ഇയാളെ പൊലീസ് കസ്റ്റഡിയിലെടുത്തത്. വ്യാഴാഴ്ച രാവിലെ നടന്ന അറസ്റ്റിനിടെ ചെറിയ തോതിൽ പ്രതിഷേധവും ഉണ്ടായതായി റിപ്പോർട്ടുകൾ പറയുന്നു.
പൊലീസ് നേരത്തെ ചോദ്യം ചെയ്യലിന് ഹാജരാകാൻ ആവശ്യപ്പെട്ട് തിമ്മരോടിക്ക് നോട്ടീസ് നൽകിയിരുന്നെങ്കിലും അദ്ദേഹം ഹാജരാകാതിരുന്നതാണ് അറസ്റ്റിലേക്ക് നയിച്ചത്. ബി.എൻ.എസ്. സെക്ഷൻ 352, 353 (2) പ്രകാരം പൊതുസമൂഹത്തിന് ദോഷം വരുത്തുന്ന പ്രസ്താവനകൾ നടത്തിയതിനാണ് കേസ് രജിസ്റ്റർ ചെയ്തത്. അറസ്റ്റിന് പിന്നിൽ ഗൂഢാലോചനയുണ്ടെന്നും ധർമ്മസ്ഥലയിലെ എസ്.ഐ.ടി. അന്വേഷണം അവസാനിപ്പിക്കാനുള്ള ശ്രമമാണിതെന്നും തിമ്മരോടി ആരോപിച്ചു.
