വൈറ്റ് ഹൗസിന് സമീപത്തെ വെടിവെപ്പിന് ഉത്തരവാദികൾ ജോ ബൈഡൻ ഭരണകൂടമെന്ന് ഡോണാൾഡ് ട്രംപ്

വാഷിങ്ടൺ: വൈറ്റ് ഹൗസിന് സമീപം ബുധനാഴ്ച നടന്ന വെടിവെപ്പിന് ഉത്തരവാദികൾ ജോ ബൈഡൻ ഭരണകൂടമെന്ന് കുറ്റപ്പെടുത്തി യുഎസ് പ്രസിഡന്റ് ഡോണാൾഡ് ട്രംപ്. വെടിവെപ്പിനെച്ചൊല്ലി മാധ്യമങ്ങളോട് സംസാരിക്കവേയാണ് ട്രംപ് ഈ രൂക്ഷ പ്രതികരണം നടത്തിയത്. ബൈഡൻ ഭരണകൂടം അവരെ അകത്ത് കയറ്റിവിട്ടുവെന്നും അവർ (കുടിയേറ്റക്കാർ) ഒരിക്കൽ രാജ്യത്ത് പ്രവേശിച്ചാൽ പിന്നെ പുറത്താക്കാനാകില്ലെന്നും ട്രംപ് പറഞ്ഞു.

നിങ്ങൾ ഒരു വിഡ്ഢിയായതു കൊണ്ടാണ് ഇത്തരം ചോദ്യങ്ങൾ ചോദിക്കുന്നത് എന്നായിരുന്നു ബൈഡൻ ഭരണകൂടത്തെ എന്തിന് കുറ്റപ്പെടുത്തുന്നുവെന്ന് ചോദിച്ച റിപ്പോർട്ടറോട് ട്രംപിൻ്റെ പ്രതികരണം. കാരണം അവർ അവനെ അകത്തേക്ക് കടത്തിവിട്ടു. നിങ്ങൾക്ക് വിവരമില്ലേ? നിങ്ങൾ ഒരു വിഡ്ഢിയാണോ? കാരണം, ഇവിടെ ഉണ്ടാകാൻ പാടില്ലാത്ത ആയിരക്കണക്കിന് ആളുകൾക്കൊപ്പം അവരും വിമാനത്തിൽ വന്നു. നിങ്ങൾ ഒരു വിഡ്ഢിയായതുകൊണ്ടാണ് ഇത്തരം ചോദ്യങ്ങൾ ചോദിക്കുന്നതെന്ന് ട്രംപ് പറഞ്ഞു.

അവരെ പുറത്താക്കുന്നത് മിക്കവാറും അസാധ്യമാക്കുന്ന ഒരു നിയമം നിലവിലുണ്ട്. അവർ ഒരിക്കൽ രാജ്യത്ത് പ്രവേശിച്ചാൽ പിന്നെ അവരെ പുറത്താക്കാനാകില്ല. അവർ വന്നത് ഒരു പരിശോധനയും കൂടാതെയാണ്. അവരെ ആരും നിയന്ത്രിച്ചില്ല. അവരിൽ ഒരുപാടു പേരുണ്ടായിരുന്നു. അവർ വലിയ വിമാനങ്ങളിലാണ് വന്നതെന്നും അത് അപമാനകരമായിരുന്നുവെന്നും ബൈഡന്റെ കാലത്തെ സുരക്ഷാ പരിശോധനാ പ്രക്രിയയെ വിമർശിച്ച് കൊണ്ട് ട്രംപ് പറഞ്ഞു.

അതേസമയം, അഫ്ഗാനിസ്ഥാനിൽ നിന്നുള്ള പിന്മാറ്റത്തെക്കുറിച്ചും ബൈഡൻ ഭരണകൂടത്തെ ട്രംപ് കുറ്റപ്പെടുത്തി. അഫ്ഗാനിസ്ഥാനിലെ സാഹചര്യം മുഴുവൻ താറുമാറായി. പിന്മാറാനായിരുന്നു തീരുമാനമെങ്കിൽ അത് ഇങ്ങനെയല്ല നടക്കേണ്ടിയിരുന്നത്. ഞങ്ങൾ പിന്മാറുമായിരുന്നു, കാരണം ഞാൻ എല്ലാവരെയും അതിന് തയ്യാറാക്കി നിർത്തിയിരുന്നു. ശക്തിയോടും അന്തസ്സോടും കൃത്യതയോടും കൂടി പിന്മാറാനായിരുന്നു ഞങ്ങളുടെ പദ്ധതിയെന്നും ട്രംപ് പറഞ്ഞു.

ബഗ്രാം വ്യോമതാവളം അമേരിക്ക നിലനിർത്തണമായിരുന്നു എന്ന വാദവും ട്രംപ് ആവർത്തിച്ചു. ചൈനയുമായുള്ള അതിന്റെ സാമീപ്യവും അവർ മിസൈലുകൾ നിർമ്മിക്കുന്ന സ്ഥലവും പരിഗണിച്ച് അത് ആവശ്യമായിരുന്നു. എന്നാൽ ആയിരക്കണക്കിന് ആളുകളെ ഇങ്ങനെ രാജ്യത്തേക്ക് കടത്തിവിട്ടതിലൂടെ അവർ ഭീകരമായ തെറ്റാണ് ചെയ്‌തത്‌. അവർ കഴിവുകെട്ടവരായിരുന്നുവെന്നും ട്രംപ് പ്രതികരിച്ചു.

അഫ്ഗാനിസ്ഥാനിൽ നിന്നുള്ള യുഎസ് പിന്മാറ്റത്തിന് ശേഷം ആരംഭിച്ച പുനരധിവാസ പദ്ധതിയായ ‘ഓപ്പറേഷൻ അലൈസ് വെൽക്കം’ പ്രകാരം 2021 സെപ്റ്റംബർ എട്ടിനാണ് ബുധനാഴ്ചത്തെ വെടിവെപ്പിലെ പ്രതിയായ ഇരുപത്തൊമ്പതുകാരനായ റഹ്‌മാനുള്ള ലകൻവാൾ അമേരിക്കയിൽ പ്രവേശിച്ചത്. ലകൻവാൾ ഇതിനുമുമ്പ് അഫ്ഗാനിസ്ഥാനിൽ സിഐഎയ്ക്കൊപ്പം പ്രവർത്തിച്ചിരുന്നതായും റിപ്പോർട്ട് ഉണ്ട്. വൈറ്റ് ഹൗസിൽനിന്ന് ഏതാനും ബ്ലോക്കുകൾ അകലെ, ഐസൻഹോവർ എക്സിക്യൂട്ടീവ് ഓഫീസ് കെട്ടിടത്തിനടുത്തായി 17-ാം സ്ട്രീറ്റ് എൻഡബ്ല്യു, ഐ സ്ട്രീറ്റ് എൻഡബ്ല്യു എന്നിവയ്ക്ക് സമീപം ബുധനാഴ്ച്ച ഉച്ചകഴിഞ്ഞാണ് വെടിവെപ്പ് നടന്നത്. സംഭവത്തിൽ ഒരു നാഷണൽ ഗാർഡ് അംഗം കൊല്ലപ്പെടുകയും മറ്റൊരാൾക്ക് ഗുരുതരമായി പരിക്കേൽക്കുകയും ചെയ്‌തിരുന്നു.

Donald Trump says Joe Biden administration is responsible for shooting near White House