ബെംഗളൂരു: ബെംഗളൂരുവിലെ ഫക്കീർ കോളനിയിലും വസീം ലേഔട്ടിലും നടന്ന കുടിയൊഴിപ്പിക്കൽ നടപടിയെ രൂക്ഷമായി വിമർശിച്ച കേരള മുഖ്യമന്ത്രി പിണറായി വിജയന് മറുപടിയുമായി കർണാടക ഉപമുഖ്യമന്ത്രി ഡി.കെ. ശിവകുമാർ. കർണാടകയുടെ ആഭ്യന്തരകാര്യങ്ങളിൽ ഇടപെടരുതെന്നും യാഥാർഥ്യങ്ങൾ മനസ്സിലാക്കാതെ വിമർശനം നടത്തരുതെന്നും ശിവകുമാർ ആവശ്യപ്പെട്ടു.
കഴിഞ്ഞ ആഴ്ച കൊഗിലു പ്രദേശത്ത് നടന്ന ഒഴിപ്പിക്കലിൽ നൂറുകണക്കിന് കുടുംബങ്ങൾ, പ്രധാനമായും മുസ്ലിം സമുദായാംഗങ്ങൾ, ഭവനരഹിതരായി. ഈ നടപടി ‘ബുൾഡോസർ രാജ്’ ആണെന്നും സംഘപരിവാർ ശൈലിയിലുള്ള ന്യൂനപക്ഷ വിരുദ്ധ നയമാണെന്നും ആരോപിച്ച് പിണറായി വിജയൻ ഫേസ്ബുക്ക് പോസ്റ്റിലൂടെ വിമർശിച്ചിരുന്നു. ഇത് കോൺഗ്രസ് ഭരണത്തിൽ നടക്കുന്നത് ആശ്ചര്യകരമാണെന്നും അദ്ദേഹം ചൂണ്ടിക്കാട്ടി.
എന്നാൽ, ഒഴിപ്പിക്കൽ നടന്ന സ്ഥലം സർക്കാർ ഭൂമിയാണെന്നും ഖരമാലിന്യ നിക്ഷേപത്തിനായി നീക്കിവച്ച ക്വാറി കുഴിയാണെന്നും ശിവകുമാർ വിശദീകരിച്ചു. ഇത് അനധികൃത കയ്യേറ്റമാണെന്നും ഭൂമാഫിയയുടെ ശ്രമമാണെന്നും അദ്ദേഹം ആരോപിച്ചു. ദുരിതബാധിതരെ മാനുഷികമായി മാറ്റിപ്പാർപ്പിച്ചിട്ടുണ്ടെന്നും അർഹരായവർക്ക് രാജീവ് ഗാന്ധി ആവാസ് യോജന പ്രകാരം ഭവനം നൽകുമെന്നും ശിവകുമാർ ഉറപ്പുനൽകി. പിണറായിയുടെ വിമർശനം രാഷ്ട്രീയ ലക്ഷ്യത്തോടെയുള്ളതാണെന്നും തെരഞ്ഞെടുപ്പ് കാലത്തെ ഗിമ്മിക്കാണെന്നും അദ്ദേഹം കുറ്റപ്പെടുത്തി.
കർണാടക മുഖ്യമന്ത്രി സിദ്ധരാമയ്യയും ഇടപെട്ട് അർഹരായവർക്ക് ഭവനസൗകര്യം ഉറപ്പാക്കുമെന്ന് പ്രഖ്യാപിച്ചു. സംഭവം ഇരു സംസ്ഥാനങ്ങളിലെയും രാഷ്ട്രീയ പാർട്ടികൾ തമ്മിലുള്ള വാക്പോരിന് കാരണമായിട്ടുണ്ട്.
