ഡൽഹി: രാജ്യവ്യാപകമായി തീവ്ര വോട്ടർ പട്ടിക പരിഷ്കരണ (എസ്ഐആർ) ഷെഡ്യൂൾ തിങ്കളാഴ്ച തിരഞ്ഞെടുപ്പ് കമ്മിഷൻ പ്രഖ്യാപിക്കും. വൈകിട്ട് 4.15-ന് നടക്കുന്ന വാർത്താസമ്മേളനത്തിൽ ഷെഡ്യൂൾ വിശദീകരിക്കുമെന്നാണ് വിവരം. എല്ലാ സംസ്ഥാനങ്ങളുടെയും ചീഫ് ഇലക്ട്രൽ ഓഫീസർമാരുമായി മുഖ്യ തിരഞ്ഞെടുപ്പ് ഓഫീസർ കഴിഞ്ഞ ദിവസം യോഗം ചേർന്നിരുന്നു, തുടർന്ന് വിവിധ സംസ്ഥാനങ്ങളിലെ ഓഫീസർമാരുമായി വ്യക്തിഗത ചർച്ചകളും നടത്തി. അടുത്ത വർഷം തിരഞ്ഞെടുപ്പ് നടക്കാനിരിക്കുന്ന കേരളം, അസം, ബംഗാൾ, തമിഴ്‌നാട്, പുതുച്ചേരി എന്നിവിടങ്ങളിൽ ആദ്യ ഘട്ടത്തിൽ എസ്ഐആർ നടപ്പാക്കാൻ സാധ്യതയുണ്ട്.
കേരളത്തിൽ തദ്ദേശ തിരഞ്ഞെടുപ്പ് അടുത്തിരിക്കുന്നതിനാൽ എസ്ഐആർ ഇപ്പോൾ നടത്തേണ്ടതില്ലെന്ന് കേരളത്തിന്റെ ചീഫ് ഇലക്ട്രൽ ഓഫീസർ രത്തൻ ഖേൽകർ ആവശ്യപ്പെട്ടിരുന്നു. ഇതിനായി തിരഞ്ഞെടുപ്പ് കമ്മിഷന് കത്തും നൽകിയെങ്കിലും ഈ ആവശ്യം അംഗീകരിക്കപ്പെട്ടില്ല. ആദ്യ ഘട്ടത്തിൽ 10-15 സംസ്ഥാനങ്ങൾ ഉൾപ്പെടെ മൂന്ന് മാസത്തിനുള്ളിൽ പരിഷ്കരണ നടപടികൾ പൂർത്തിയാക്കാനാണ് കമ്മിഷന്റെ തീരുമാനം. കേരളം ഉൾപ്പെടെയുള്ള തിരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങൾക്ക് ഇതിൽ മുൻഗണന നൽകിയേക്കും.
എസ്ഐആർ ലക്ഷ്യമിടുന്നത് യോഗ്യരായ വോട്ടർമാരെ പട്ടികയിൽ ഉൾപ്പെടുത്തുകയും അയോഗ്യരെ ഒഴിവാക്കി വ്യക്തതയുള്ള വോട്ടർ പട്ടിക തയ്യാറാക്കുകയുമാണ്. വോട്ടർമാരുടെ വീടുകളിൽ നേരിട്ട് വെരിഫിക്കേഷൻ നടത്തി പരമാവധി കൃത്യത ഉറപ്പാക്കാനാണ് ശ്രമം. എന്നാൽ, ബിഹാർ തിരഞ്ഞെടുപ്പിന് മുന്നോടിയായി നടന്ന എസ്ഐആർ വിവാദമായിരുന്നു. പരിഷ്കരണത്തിനെതിരെ പ്രതിപക്ഷം ശക്തമായ പ്രതിഷേധം ഉയർത്തിയിരുന്നതിനാൽ, കേരളത്തിലും സമാന ആശങ്കകൾ ഉയർന്നേക്കാമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
