വാഷിങ്ടൺ: ട്രംപിനും മസ്കിനെയും ഇടയിലെ മഞ്ഞ് ഉരുകുന്നുവെന്ന് റിപ്പോർട്ടുകൾ. തെറ്റിപ്പിരിഞ്ഞ ശേഷം രണ്ടാം തവണയാണ് ഇരുവരും ഒന്നിച്ച് ഒരു പരിപാടിയിൽ പങ്കെടുക്കുന്നത്. വൈറ്റ് ഹൗസിൽ സൗദി കിരീടവകാശി മുഹമ്മദ് ബിൻ സൽമാൻ രാജകുമാരന് ചൊവ്വാഴ്ച ഒരുക്കിയ അത്താഴവിരുന്നിലാണ് അമേരിക്കൻ പ്രസിഡന്റ് ഡോണാൾഡ് ട്രംപും ശതകോടീശ്വരനും എക്സ് മേധാവിയുമായ ഇലോൺ മസ്കു‌ം പങ്കെടുത്തത്.
ഇതിന് മുമ്പ് അമേരിക്കൻ വലതുപക്ഷ യാഥാസ്ഥിതികനായ ചാർലി കിർക്കിന്റെ ശവസംസ്‌കാര ചടങ്ങിലായിരുന്നു ഇരുവരും ഒന്നിച്ച് പങ്കെടുത്തത്. അന്ന് ഇരുവരും ഹസ്‌തദാനം ചെയ്തത് വലിയ വാർത്തയായിരുന്നു. ഇപ്പോൾ ട്രംപ് ഒരുക്കിയ അത്താഴവിരുന്നിലെ ദൃശ്യങ്ങളും ചർച്ചാവിഷയമാകുന്നുണ്ട്.
ട്രംപിനെ അമേരിക്കയിൽ അധികാരത്തിലേറ്റുന്നതിൽ ഇലോൺ മസ്ക് സുപ്രധാന പങ്ക് വഹിച്ചിരുന്നു. തിരഞ്ഞെടുപ്പുകളിലുടനീളം തന്റെ സാന്നിധ്യവും അദ്ദേഹം ഉറപ്പുവരുത്തിയിരുന്നു. ഇതിന്റെ പ്രത്യുപകാരമെന്നോണം, ട്രംപ് അധികാരത്തിലേറിയതിന് പിന്നാലെ യുഎസ് സർക്കാരിന്റെ ചെലവുചുരുക്കാനും കാര്യക്ഷമത വർധിപ്പിക്കാനുമായി ഡിപ്പാർട്ട്മെന്റ് ഓഫ് ഗവൺമെന്റ് എഫിഷ്യൻസി (DOGE) എന്ന പുതിയൊരു വിഭാഗത്തിന് രൂപംകൊടുക്കുകയും ഇതിൻ്റെ ചുമതല മസ്കിനെ ഏൽപ്പിക്കുകയും ചെയ്തിരുന്നു.
വിവിധ സർക്കാർ വകുപ്പുകളിൽനിന്ന് ആയിരക്കണക്കിന് ജീവനക്കാരെ പിരിച്ചുവിടുന്നതിനും ചില വകുപ്പുകൾ നിർത്തലാക്കുകയും തുടങ്ങി കുറഞ്ഞ കാലയളവിനുള്ളിൽ തന്നെ മസ്ക് വൈറ്റ് ഹൗസിൽ നിർണായക മാറ്റങ്ങൾ കൊണ്ടുവന്നിരുന്നു. അതേസമയം, ട്രംപ് ജനങ്ങൾക്കേർപ്പെടുത്തിയ ‘വൺ ബിഗ് ബ്യൂട്ടിഫുൾ ബില്ലി’ന്റെ പേരിലാണ് ഇരുവരും തെറ്റി പിരിഞ്ഞതും മസ്ക് വകുപ്പ് ചുമതലയിൽനിന്ന് ഒഴിഞ്ഞതും പിന്നീട് ഇരുവരും പരസ്യപ്പോരിലേക്കും കടക്കുകയും ചെയ്തത്.
Elon Musk was among the guests spotted at President Trump’s black tie dinner in honor of Saudi Crown Prince Mohammed bin Salman at the White House on Tuesday evening.
