ശ്രീനഗര്‍: ജമ്മു കശ്മീരിലെ കത്വ ജില്ലയില്‍ ഭീകരരുമായുള്ള ഏറ്റുമുട്ടലില്‍ നാല് പൊലീസുകാര്‍ കൊല്ലപ്പെട്ടു. തീവ്രവാദികളില്‍ രണ്ട് പേര്‍ വെടിയേറ്റു മരിച്ചതായും മൂന്നോ അതിലധികമോ തീവ്രവാദികള്‍ ഇപ്പോഴും ഒളിച്ചിരിക്കുന്നതായും വൃത്തങ്ങള്‍ അറിയിച്ചു. മാരകമായ വെടിവയ്പ്പില്‍ ഒരു ഡെപ്യൂട്ടി പൊലീസ് സൂപ്രണ്ട് ഉള്‍പ്പെടെ അഞ്ച് സുരക്ഷാ ഉദ്യോഗസ്ഥര്‍ പരുക്കേറ്റ് ആശുപത്രിയില്‍ ചികിത്സയിലാണ്.
വിവിധ സുരക്ഷാ സേന അംഗങ്ങള്‍ കഴിഞ്ഞ അഞ്ച് ദിവസമായി പ്രദേശത്ത് തിരച്ചില്‍ നടത്തിവരികയായിരുന്നു. ഞായറാഴ്ച വെടിവയ്പ്പ് നടന്നപ്പോള്‍, സൈനിക യൂണിഫോമിലുള്ള രണ്ട് പേര്‍ വെള്ളം ആവശ്യപ്പെട്ടതായി ഒരു പ്രദേശവാസി ചൊവ്വാഴ്ച പൊലീസിനെ അറിയിച്ചിരുന്നു. വ്യാഴാഴ്ച പൊലീസുകാര്‍ വനത്തിനുള്ളില്‍ പ്രവേശിച്ച് ആയുധധാരികളായ തീവ്രവാദികളുമായി കടുത്ത പോരാട്ടത്തില്‍ ഏര്‍പ്പെടുകയായിരുന്നു.
