എസ്സൻസ് ഗ്ലോബൽ ഫെസ്റ്റ് യുഎസ്എ 2025 കളറാകും, ഷിക്കാഗോയിൽ ഓഗസ്റ്റ് 2 ന് ശാസ്ത്ര-സ്വതന്ത്രചിന്താ സെമിനാർ; നിരവധി പ്രശസ്തർ സെമിനാറിന്‍റെ ഭാഗമാകും

ശാസ്ത്രീയ മനോഭാവം, സ്വതന്ത്രചിന്ത, നിരീശ്വരവാദം എന്നിവ ജനകീയമാക്കി ആധുനിക സമൂഹം കെട്ടിപ്പടുക്കുക എന്ന ആശയത്തിൽ പ്രവർത്തിക്കുന്ന എസ്സൻസ് ഗ്ലോബൽ, ഷിക്കാഗോയിൽ “ശാസ്ത്ര-സ്വതന്ത്രചിന്താ സെമിനാർ” സംഘടിപ്പിക്കുന്നു. ഓഗസ്റ്റ് 2 ശനിയാഴ്ച രാവിലെ 8:30 മുതൽ വൈകിട്ട് 6:00 വരെ ഷിക്കാഗോയിലെ ക്നാനായ കൺവെൻഷൻ സെന്ററിൽ (1800 E Oakton St, Des Plaines, IL 60018) വച്ചാണ് പരിപാടി നടക്കുന്നത്. ശാസ്ത്ര, സാമൂഹിക വിഷയങ്ങളെ അടിസ്ഥാനമാക്കിയുള്ള ഡിബേറ്റുകൾ, പാനൽ ചർച്ചകൾ, പ്രസന്റേഷനുകൾ എന്നിവയാണ് പ്രധാന പരിപാടികൾ. മാത്രുഭൂമി ചാനലിലെ പ്രമുഖ അവതാരകൻ അഭിലാഷ് മോഹനൻ, എഴുത്തുകാരനും പ്രാസംഗികനുമായ ടോമി സെബാസ്റ്റ്യൻ എന്നിവരടക്കം നിരവധി പ്രമുഖർ പരിപാടിയിൽ പങ്കെടുക്കും. കലാപരിപാടികളും മെന്റലിസം ഷോയും ഉൾപ്പെടെയുള്ള വിനോദ പരിപാടികൾ സെമിനാറിന്റെ മാറ്റ് കൂട്ടും.

വസ്തുതാധിഷ്ഠിത രാഷ്ട്രീയവും തെളിവുകളെ അടിസ്ഥാനമാക്കിയുള്ള വൈദ്യവും മാനവികത ഉയർത്തിപ്പിടിക്കുന്ന സമൂഹവും പ്രോത്സാഹിപ്പിക്കുക എന്നതാണ് എസ്സൻസ് ഗ്ലോബലിന്‍റെ ലക്ഷ്യം. മതം രാഷ്ട്രീയത്തിൽ ആധിപത്യം പുലർത്തുന്ന സാഹചര്യത്തിൽ, പ്രത്യേകിച്ച് കേരളത്തിൽ, നിരീശ്വരവാദവും യുക്തിചിന്തയും പരസ്യമായി പ്രചരിപ്പിക്കുന്നതിൽ സംഘടന ശക്തമായ നിലപാട് സ്വീകരിക്കുന്നു. അന്ധവിശ്വാസങ്ങൾ, ഗോത്രവാദം, കപടശാസ്ത്രം, മുറിവൈദ്യന്മാർ എന്നിവയെ ശക്തമായി എതിർക്കുന്ന എസ്സൻസ് ഗ്ലോബൽ, രാഷ്ട്രീയ പക്ഷപാതങ്ങളിൽ നിന്ന് മുക്തമായ വസ്തുതാധിഷ്ഠിത രാഷ്ട്രീയത്തിന് വേണ്ടി നിലകൊള്ളുന്ന സംഘടനയാണ്.

ലോകത്തിലെ ഏറ്റവും വലിയ നാസ്തിക സമ്മേളനമായ ലിറ്റ്മസ് സംഘടനയുടെ പ്രധാന ആഘോഷമാണ്. 2018 ൽ തിരുവനന്തപുരത്ത് ആരംഭിച്ച ലിറ്റ്മസ്, 2019 ൽ കോഴിക്കോട്, 2022ൽ എറണാകുളം, 2023 ൽ വീണ്ടും തിരുവനന്തപുരം എന്നിവിടങ്ങളിൽ നടന്നു. ഓരോ വർഷവും പതിനായിരത്തോളം ആളുകൾ ലോകത്തിന്റെ വിവിധ ഭാഗങ്ങളിൽ നിന്ന് ഈ സമ്മേളനത്തിൽ പങ്കെടുക്കുന്നു. യുക്തിചിന്തയും വിമർശനാത്മക അന്വേഷണവും പ്രോത്സാഹിപ്പിക്കുന്ന ഈ വേദി, ചിന്തോദീപകമായ സെഷനുകളിലൂടെ അന്താരാഷ്ട്ര ശ്രദ്ധ നേടിയിട്ടുണ്ട്. യു എസിൽ 2024ൽ ഡിട്രോയിറ്റിൽ നടന്ന ആദ്യ വാർഷിക സമ്മേളനവും ഹൂസ്റ്റണിലെ TexSENSE സെമിനാറും വൻ വിജയമായിരുന്നു. രവിചന്ദ്രൻ സി ഉൾപ്പെടെയുള്ള പ്രമുഖർ ഈ പരിപാടികളിൽ പങ്കെടുത്തിരുന്നു. ഷിക്കാഗോയിലെ സെമിനാറിൽ പങ്കെടുക്കാൻ ആഗ്രഹിക്കുന്നവർ https://shorturl.at/EZORU വഴി രജിസ്റ്റർ ചെയ്യാം. അന്വേഷണങ്ങൾക്ക് +1-248-635-2798, +1-248-837-0402 എന്നീ നമ്പറുകളിൽ ബന്ധപ്പെടാവുന്നതാണ്. പ്രവേശനം സൗജന്യമാണ്.

More Stories from this section

family-dental
witywide