വാഷിംഗ്ടൺ: വെനിസ്വേലയ്ക്ക് മുകളിലൂടെയുള്ള വ്യോമ പാതയിലൂടെ പറക്കുമ്പോൾ ജാഗ്രത പാലിക്കണമെന്ന് പൈലറ്റുമാർക്ക് മുന്നറിയിപ്പുമായി ഫെഡറൽ ഏവിയേഷൻ അഡ്മിനിസ്ട്രേഷൻ. വെനിസ്വേലയുമായി അമേരിക്കയ്ക്ക് സുഖകരമായ ബന്ധമല്ല നിലവിലുള്ളത്. വഷളാകുന്ന സുരക്ഷാ സാഹചര്യവും രാജ്യത്തുടനീളമുള്ള അനിഷ്ട സംഭവങ്ങൾ വർദ്ധിച്ചതിനാലും മുന്നറിയിപ്പു നല്കുന്നുവെന്നാണ് എഫ്എഎ പറയുന്നത്. “എല്ലാ ഉയരങ്ങളിലുമുള്ള വിമാനങ്ങൾക്കും രാജ്യത്ത് പറന്നുയരുന്നതും ഇറങ്ങുന്നതുമായ വിമാനങ്ങൾക്കും നിലത്തുള്ള വിമാനങ്ങൾക്കും പോലും അപകടസാധ്യതയുണ്ടാക്കുമെന്നും” സന്ദേശത്തിൽ പറയുന്നു.
ട്രംപ് ഭരണകൂടം വെനിസ്വേലൻ പ്രസിഡന്റ് നിക്കോളാസ് മഡുറോയിൽ സമ്മർദ്ദം ശക്തമാക്കിയതോടെയാണ് മുന്നറിയിപ്പ്. യുഎസ് സൈന്യം വെനിസ്വേലയുടെ തീരത്തേക്ക് ബോംബർ വിമാനങ്ങൾ അയച്ചിട്ടുണ്ട്. കൂടാതെ യുഎസ്എസ് ജെറാൾഡ് ആർ. ഫോർഡ് എന്ന വിമാനവാഹിനിക്കപ്പലും ഈ മേഖലയിലുണ്ട്. ഫോർഡ് വിമാനവാഹിനിക്കപ്പലും നിരവധി ഡിസ്ട്രോയറുകളും വെനിസ്വേലയ്ക്ക് സമീപം കരീബിയൻ കടലിലുണ്ട്.
യുഎസിൽ മയക്കുമരുന്ന് ഭീകരവാദ കുറ്റം നേരിടുന്ന മഡുറോയെ തെക്കേ അമേരിക്കൻ രാജ്യത്തിന്റെ നിയമാനുസൃത നേതാവായി ട്രംപ് ഭരണകൂടം കാണുന്നില്ല. യുഎസിലേക്ക് മയക്കുമരുന്ന് കടത്തിയെന്ന് ആരോപിച്ച് കരീബിയൻ കടലിലും കിഴക്കൻ പസഫിക് സമുദ്രത്തിലും ചെറു ബോട്ടുകളിൽ ട്രംപ് ഭരണകൂടം നിരവധി ആക്രമണങ്ങൾ നടത്തിയിട്ടുണ്ട്. ഇത്തരം ആക്രമണങ്ങളിൽ ഇതുവരെ ആകെ 80- ലധികം പേർ കൊല്ലപ്പെട്ടു.
FAA warns pilots to be cautious when flying over Venezuela as security situation ‘deteriorates’.
