ഡൽഹി സ്ഫോടനക്കേസിൽ അറസ്റ്റിലായ ഫരീദാബാദ് ഭീകര സംഘം ഡൽഹിയിൽ വൻ ഭീകരാക്രമണം നടത്താൻ പദ്ധതിയിട്ടതായി റിപ്പോർട്ടുകൾ. ചെങ്കോട്ടയിൽ കഴിഞ്ഞ റിപ്പബ്ലിക് ദിനത്തിനും ദീപാവലി ദിവസം ഡൽഹിയിൽ തിരക്കേറിയ ഇടത്തും സ്ഫോടനത്തിന് പദ്ധതിയിട്ടിരുന്നു. ജനുവരി ആദ്യ ആഴ്ച ഡോ.മുസമ്മിലും ഉമറും ചെങ്കോട്ട പരിസരത്ത് എത്തിയിരുന്നുവെന്നും അന്വേഷണ സംഘം കണ്ടെത്തി.
ഫരീദാബാദിൽ അറസ്റ്റിലായ ഡോ. മുസമ്മിലിൻ്റെ മൊബൈൽ ഫോണിൽ നിന്നാണ് വിവരങ്ങൾ ലഭിച്ചത്. കേസിൽ ഇതിനോടകം 15 പേരെയാണ് അന്വേഷണ സംഘം അറസ്റ്റ് ചെയ്തിരിക്കുന്നത്. മൂന്ന് പേരെ കസ്റ്റഡിയിൽ എടുത്തു.
അതേസമയം ജമ്മു കാശ്മീരിൽ സോപോർ,കുൽഗം എന്നിവിടങ്ങളിലെ 230 ഇടങ്ങളിൽ ഭീകരകർക്കായി വ്യാപക റെയ്ഡ് നടക്കുകയാണ്. നിരോധിത സംഘടനയായ ജമാഅത്തെ ഇസ്ലാമി (ജെഇഐ) അംഗങ്ങളുടെ വീടുകളിലാണ് റെയ്ഡ് നടക്കുന്നത്. ഡല്ഹിയില് സ്ഫോടനം നടത്തിയ ഉമര് മുഹമ്മദ് ആണ് വൈറ്റ് കോളര് ഭീകര സംഘത്തിന്റെ നേതാവെന്നാണ് അന്വേഷണ ഏജന്സികളുടെ കണ്ടെത്തൽ.
70 കിലോയോളം അമോണിയം നൈട്രേറ്റാണ് കാറില് ഉണ്ടായിരുന്നത്. സ്ഫോടനം നടത്തിയത് ഡിറ്റിനേറ്ററോ, ടൈമറോ ഉപയോഗിച്ച് എന്നാണ് സൂചന. കാറില് ഐഇഡി ഉണ്ടായിരുന്നതിന് ഇതുവരെയും തെളിവ് ലഭിച്ചില്ല. വയറുകളോ, ടൈമര് ഉപകരണങ്ങളോ, ഡിറ്റണേറ്ററോ, ബാറ്ററികളോ,ലോഹ ചീളുകളോ കണ്ടെത്താന് കഴിഞ്ഞിട്ടില്ല. എൻഐഎയുടെ നേതൃത്വത്തിൽ അന്വേഷണം പുരോഗമിക്കുകയാണ്.
Faridabad terror group targets major terror attack in Delhi
