പാരീസ്: അന്തരിച്ച ലിബിയൻ സ്വേച്ഛാധിപതി മുഅമ്മർ ഗദ്ദാഫിയിൽ നിന്ന് സാമ്പത്തികസഹായം തേടിയെന്ന കുറ്റത്തിന് ശിക്ഷിക്കപ്പെട്ട ഫ്രാൻസ് മുൻ പ്രസിഡൻ്റ് നിക്കോളാസ് സർക്കോസി ഏകാന്ത തടവിലേക്ക്. അഞ്ച് വർഷത്തെ തടവ് ശിക്ഷയ്ക്കാണ് വിധിച്ചിരിക്കുന്നത്. പാരീസിലെ മൊണ്ട്പാർനാസെ ജില്ലയിലുള്ള ലാ സാന്റേ ജയിലിലാണ് സർക്കോസിയെ തടവിലാക്കുന്നത്.
ജയിലിലെ മറ്റ് തടവുകാർ മയക്കുമരുന്ന് കച്ചവടക്കാരോ, ഭീകരവാദ കുറ്റകൃത്യങ്ങൾക്ക് ശിക്ഷിക്കപ്പെട്ടവരോ ആയതിനാൽ സുരക്ഷയെ മുൻനിർത്തിയാണ് സർക്കോസിയെ ജയിലിന്റെ ഐസൊലേഷൻ വിഭാഗത്തിൽ പാർപ്പിക്കുന്നത്. ജയിലിൽ പ്രാഥമിക കൃത്യങ്ങൾ നിർവഹിക്കാനായി ഒരു ടോപ്ലെറ്റ്, കുളിക്കാനായി ഷവർ, മേശ, ഒരു ചെറിയ ഇലക്ട്രിക് ഹോബ്, ഒരു ചെറിയ ടിവി എന്നിങ്ങനെ പരിമിതമായ സൗകര്യങ്ങൾ ലഭിക്കും. ദിവസവും ഒരുമണിക്കൂർ വ്യായാമത്തിന് വേണ്ടി മാത്രമാകും അദ്ദേഹത്തിന് ജയിലിൽ നിന്ന് പുറത്തിറങ്ങാൻ സാധിക്കുക.
അതേസമയം, ശിക്ഷയ്ക്കെതിരെ സർക്കോസി അപ്പീൽ നൽകിയെങ്കിലും കേസിന്റെ ഗൗരവം കണക്കിലെടുത്താണ് ജയിലിൽ പ്രവേശിക്കാൻ കോടതി നിർദ്ദേശിച്ചത്. പാരീസിലെ വീട്ടിൽ നിന്ന് ഭാര്യ കാർള ബ്രൂണിയോടൊപ്പമാണ് സർക്കോസി ജയിലിലേക്ക് പുറപ്പെട്ടത്. 1945-ൽ രണ്ടാം ലോകമഹായുദ്ധത്തിൽ നാസികളുമായി സഹകരിച്ചതിന് ഫിലിപ്പ് പെറ്റൈൻ എന്ന ഫ്രഞ്ച് നേതാവ് രാജ്യദ്രോഹത്തിന് തടവിലാക്കപ്പെട്ടതിനുശേഷം ഇതാദ്യമായാണ് ഒരു മുൻ ഫ്രഞ്ച് നേതാവ് ജയിലറയ്ക്കുള്ളിലാകുന്നത്.
Former French president Nicolas Sarkozy starts five-year jail term
