ഹൂസ്റ്റൺ: ഹൂസ്റ്റണിൽ ക്നാനായ സമൂഹം കെട്ടിപ്പടുക്കുന്നതിലും ക്നാനായ കമ്മ്യൂണിറ്റി സെന്റർ സ്ഥാപിക്കുന്നതിലും നിർണായക പങ്കുവഹിച്ച ഫാ. ജോസഫ് മണപ്പുറം അന്തരിച്ചു. 81 വയസായിരുന്നു. കോട്ടയം ജില്ലയിലെ ഒളശ സ്വദേശിയായ ഫാ. ജോസഫ് മണപ്പുറം 1969 ൽ കോട്ടയം ക്നാനായ അതിരൂപതയിലെ വൈദികനായി പട്ടം സ്വീകരിച്ചു. മണപ്പുറത്ത് പരേതരായ ഉതുപ്പാൻ പുന്നനും ഏലിക്കുട്ടിയുമാണ് മാതാപിതാക്കൾ.
യുഎസിലെ വിവിധ ഇടവകകളിൽ സേവനം അനുഷ്ഠിച്ചു വരികയായിരുന്നു. 1998 ൽ യുഎസിൽ എത്തിയ മണപ്പുറത്തച്ചൻ ഹ്യൂസ്റ്റൺ ക്നാനായ കാത്തലിക് മിഷൻ ഡയറക്ടറായി ചുമതലയേറ്റു. 2006 വരെ അദ്ദേഹം ആ ചുമതല വഹിച്ചിരുന്നു. 1998 – 2007 കാലഘട്ടത്തിൽ ഡാലസ് ക്നാനായ കാത്തലിക് മിഷൻ്റെ ചുമതലയും അദ്ദേഹത്തിനായിരുന്നു. മികച്ച ഗായകനുമായിരുന്നു.
ഹൂസ്റ്റണിലേയും ഡാലസിലേയും ജനകീയനായ പുരോഹിതനായിരുന്ന അദ്ദേഹം ക്നാനായ സമൂഹത്തെ നയിക്കുകയും എല്ലാവരുമായും വ്യക്തി ബന്ധം സ്ഥാപിക്കുകയും ചെയ്തിരുന്നു.
സഹോദരങ്ങൾ : ജോർജ് , ലീലാമ്മ വടക്കേടം , മേരി കാളവേലിൽ , എൽസി തുരുത്തുവേലിൽ , ജെസി മൂഴിയിൽ. മറ്റു വിവരങ്ങൾ പിന്നീട്..
