ലോസ് ഏഞ്ചൽസ്: കെറ്റാമിൻ ലഹരിമരുന്ന് നിയമവിരുദ്ധമായി വിതരണം ചെയ്ത കാലിഫോർണിയിലെ ഡോക്ടർ പ്ലാസെൻഷ്യയ്ക്ക് ഫെഡറൽ കോടതി മുപ്പത് മാസത്തെ തടവ് ശിക്ഷ വിധിച്ചു. പ്രശസ്ത സീരിസായ ‘ഫ്രണ്ട്സ്’ താരം മാത്യു പെറിയുടെ മരണത്തിലേക്ക് നയിച്ച കെറ്റാമിൻ ലഹരിമരുന്ന് നിയമവിരുദ്ധമായി വിതരണം ചെയ്ത കേസിലാണ് ഫെഡറൽ കോടതിയുടെ നടപടി.
നടന്റെ ലഹരിയോടുള്ള ആസക്തി ഡോക്ടർ സാൽവഡോർ പ്ലാസെൻഷ്യ സ്വന്തം ലാഭത്തിനായി മുതലെടുത്തു എന്ന് വിധി പ്രസ്താവിക്കവൈ കോടതി വ്യക്തമാക്കി. നടൻ മാത്യു പെറി (54) 2023 ഒക്ടോബറിലാണ് കെറ്റാമിൻ അധികരിച്ചതിനെ തുടർന്നാണ് ലോസ് ഏഞ്ചൽസിലെ വീട്ടിലെ ജാക്കൂസിയിൽ മരിച്ചത്.
പെറിക്ക് കെറ്റാമിൻ വിതരണം ചെയ്ത കേസിൽ ശിക്ഷിക്കപ്പെടുന്ന അഞ്ച് പ്രതികളിൽ ആദ്യത്തെയാളാണ് ഡോക്ടർ പ്ലാസെൻഷ്യ. പെറിയുടെ മരണത്തിന് കാരണമായ ഡോസ് നൽകിയത് താനല്ലെന്ന് ഡോക്ടർ വാദിച്ചെങ്കിലും, നടന്റെ ലഹരിയോടുള്ള ആസക്തി വർദ്ധിപ്പിക്കുന്നതിൽ പ്രധാന പങ്ക് വഹിച്ചത് ഇദ്ദേഹമാണെന്ന് കോടതി നിരീക്ഷിച്ചു.
താങ്കളും മറ്റ് ചിലരും ചേർന്നാണ് പെറിയെ ഈയൊരു അന്ത്യത്തിലേക്ക് നയിച്ചതെന്നും കെറ്റാമിനോടുള്ള അദ്ദേഹത്തിന്റെ ആസക്തി നിങ്ങൾ പ്രയോജനപ്പെടുത്തിയെന്നും ശിക്ഷ വിധിച്ച ജഡ്ജി ഷെറിലിൻ പീസ് ഗാർനെറ്റ് അഭിപ്രായപ്പെട്ടു. അതേസമയം, തനിക്കെതിരെയുള്ള കെറ്റാമിൻ വിതരണം ചെയ്ത നാല് കുറ്റങ്ങൾ ഡോക്ടർ പ്ലാസെൻഷ്യ നേരത്തെ സമ്മതിച്ചിരുന്നു.
പെറിയുടെ സ്ഥിരം ഡോക്ടർ ആവശ്യപ്പെട്ട അളവിൽ കെറ്റാമിൻ നൽകാൻ വിസമ്മതിച്ചപ്പോഴാണ് പ്ലാസെൻഷ്യ ഇടപെടുകയും വൻ തുകയ്ക്ക് അനധികൃതമായി മരുന്ന് നൽകുകയും ചെയ്തതെന്ന് പ്രോസിക്യൂട്ടർമാർ കോടതിയെ അറിയിച്ചു. കേസിൽ മാത്യു പെറിയുടെ അമ്മയും അർദ്ധസഹോദരിമാരും മൊഴി നൽകിയിരുന്നു.
Friends star Matthew Perry’s death; California doctor sentenced to 30 months in prison by federal court
