എച്ച്-1ബി, എച്ച്-4 വീസകളിൽ ജോലി ചെയ്യുന്ന ജീവനക്കാർക്ക് അടിയന്തിര നിർദേശം നൽകി മെറ്റയും മൈക്രോസോഫ്റ്റും ആമസോണുമടക്കമുള്ള അമേരിക്കയിലെ ടെക് ഭീമന്മാർ. നാട്ടിൽ പോയവർ 2025 സെപ്റ്റംബർ 21 നകം യുഎസിലേക്ക് മടങ്ങണമെന്നും, നിലവിൽ യുഎസിൽ ഉള്ളവർ രാജ്യം വിടരുതെന്നും കമ്പനികൾ ആവശ്യപ്പെട്ടു. പ്രസിഡന്റ് ഡൊണാൾഡ് ട്രംപിന്റെ വീസ പരിഷ്കരണ നിർദേശങ്ങൾ പുറത്തുവന്നതിനെ തുടർന്നാണ് ഈ തീരുമാനം. പുതിയ നയം പ്രകാരം, ഓരോ എച്ച്-1ബി വീസയ്ക്കും കമ്പനികൾ പ്രതിവർഷം ഒരു ലക്ഷം ഡോളർ (88 ലക്ഷത്തിലേറെ രൂപ) അധിക ഫീസ് നൽകേണ്ടി വരും.
ട്രംപ് സർക്കാർ കുടിയേറ്റ നിയന്ത്രണങ്ങൾ കർശനമാക്കിയതോടെ, വിദേശ ജീവനക്കാർക്ക് റീ-എൻട്രി നിരസിക്കപ്പെടാനുള്ള സാധ്യത വർധിച്ചിരിക്കുകയാണ്. മെറ്റ, മൈക്രോസോഫ്റ്റ് തുടങ്ങിയ കമ്പനികൾ ശനിയാഴ്ച രാവിലെ തങ്ങളുടെ എച്ച്-1ബി വീസ ഉടമകൾക്ക് 24 മണിക്കൂറിനുള്ളിൽ യുഎസിലേക്ക് മടങ്ങാനും, കുറഞ്ഞത് 14 ദിവസത്തേക്ക് രാജ്യത്ത് തുടരാനും ഇമെയിൽ വഴി നിർദേശം നൽകി. രാജ്യത്തിന് പുറത്തുള്ള ജീവനക്കാരോട് ‘പരമാവധി ശ്രമിച്ച് തിരിച്ചെത്താൻ’ മൈക്രോസോഫ്റ്റ് ആവശ്യപ്പെട്ടു. ഈ നടപടി ഇന്ത്യ ഉൾപ്പെടെയുള്ള രാജ്യങ്ങളിൽ നിന്നുള്ള സോഫ്റ്റ്‌വെയർ എഞ്ചിനീയർമാർ, ടെക് മാനേജർമാർ, ഐടി പ്രൊഫഷണലുകൾ എന്നിവരെ ബാധിക്കും.
യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യുഎസ്‌സിഐഎസ്) കണക്കുകൾ പ്രകാരം, 2025 ജൂൺ വരെ ആമസോണിൽ 10,044 എച്ച്-1ബി വീസ ഉടമകൾ ജോലി ചെയ്യുന്നു. ടിസിഎസ് (5,505), മൈക്രോസോഫ്റ്റ് (5,189), മെറ്റ (5,123), ആപ്പിൾ (4,202), ഗൂഗിൾ (4,181) എന്നിവയാണ് മറ്റ് പ്രധാന കമ്പനികൾ. പുതിയ നിയമങ്ങൾ നിലവിൽ വന്നാൽ, വീസ ഫീസ് 215 ഡോളറിൽ നിന്ന് 10,000-20,000 ഡോളറായി ഉയരും. ഇത് ടെക് കമ്പനികൾക്ക് സാമ്പത്തിക ബാധ്യത വർധിപ്പിക്കും, പ്രത്യേകിച്ച് ഇന്ത്യയിൽ നിന്നുള്ള 71% എച്ച്-1ബി വീസ ഗുണഭോക്താക്കളെ.
നിയമപരമായ കുടിയേറ്റത്തിന് പരിമിതികൾ ഏർപ്പെടുത്തുന്ന ട്രംപിന്റെ നയങ്ങൾ, വിദഗ്ധ തൊഴിലാളികളെ ആശ്രയിക്കുന്ന ടെക് വ്യവസായത്തിന് വെല്ലുവിളിയാകും. ഈ പരിഷ്കരണങ്ങൾ നടപ്പാക്കിയാൽ, ഇന്ത്യ, ചൈന തുടങ്ങിയ രാജ്യങ്ങളിൽ നിന്നുള്ള പ്രൊഫഷണലുകളുടെ യുഎസിലേക്കുള്ള കുടിയേറ്റം കുറയാനും സാധ്യതയുണ്ട്. കമ്പനികൾ തങ്ങളുടെ ജീവനക്കാരെ നിലനിർത്താനും പുതിയ നിയമങ്ങൾക്ക് അനുസൃതമായി പ്രവർത്തിക്കാനും തീവ്ര ശ്രമം നടത്തുകയാണ്.
