ജോഹന്നാസ്ബർഗ്: ആഫ്രിക്കൻ ഭൂഖണ്ഡത്തിൽ ആദ്യമായി നടക്കുന്ന ജി20 ഉച്ചകോടി ദക്ഷിണാഫ്രിക്കയിലെ ജോഹന്നാസ്ബർഗിൽ ആരംഭിച്ചു. പ്രധാനമന്ത്രി നരേന്ദ്ര മോദി ഉച്ചകോടിയിൽ എത്തിച്ചേർന്നു. ജോഹന്നാസ്ബർഗിൽ മോദിക്ക് ഉജ്ജ്വല സ്വീകരണമാണ്‌ ലഭിച്ചത്. 21 മുതൽ 23 വരെ നീളുന്ന സമ്മേളനത്തിൽ “ഒരു ഭൂമി, ഒരു കുടുംബം, ഒരു ഭാവി” എന്ന ഇന്ത്യയുടെ കഴിഞ്ഞ വർഷത്തെ ജി20 മുദ്രാവാക്യത്തിന്റെ തുടർച്ചയായി സുസ്ഥിര വികസനം, കാലാവസ്ഥാ വ്യതിയാനം, ഭക്ഷ്യ-ഊർജ സുരക്ഷ, ആർട്ടിഫിഷ്യൽ ഇന്റലിജൻസിന്റെ ഉത്തരവാദിത്തമുള്ള ഉപയോഗം തുടങ്ങിയ വിഷയങ്ങളിൽ ഇന്ത്യയുടെ നിലപാടുകൾ മോദി ഉന്നയിക്കും. ഗ്ലോബൽ സൗത്തിന്റെ ശബ്ദമായി ഇന്ത്യ സജീവ ഇടപെടൽ നടത്തുമെന്നാണ് പ്രതീക്ഷ.
ഉച്ചകോടിയുടെ മൂന്ന് പ്രധാന സെഷനുകളിലും പ്രധാനമന്ത്രി സംസാരിക്കും. ഇന്ത്യ-ബ്രസീൽ-ദക്ഷിണാഫ്രിക്ക (IBSA) ത്രികക്ഷി ഉച്ചകോടിയിലും അദ്ദേഹം പങ്കെടുക്കും. ഉഭയകക്ഷി കൂടിക്കാഴ്ചകളിലൂടെ ബ്രസീൽ, ജപ്പാൻ, ഇന്തോനേഷ്യ, ഓസ്ട്രേലിയ തുടങ്ങിയ രാജ്യങ്ങളുമായുള്ള ബന്ധം ശക്തിപ്പെടുത്താനും പദ്ധതിയുണ്ട്. അമേരിക്കൻ പ്രസിഡന്റ് ഡൊണാൾഡ് ട്രംപ് ഉച്ചകോടിയിൽ നിന്ന് വിട്ടുനിൽക്കുമെന്ന് പ്രഖ്യാപിച്ച സാഹചര്യത്തിൽ ചൈനീസ് പ്രസിഡന്റ് ഷി ജിൻപിങ്, യൂറോപ്യൻ യൂണിയൻ നേതാക്കൾ, പ്രധാനമന്ത്രി മോദി തുടങ്ങിയവരുടെ സാന്നിധ്യം ലോകശ്രദ്ധ നേടുന്നുണ്ട്.
ആഫ്രിക്കൻ യൂണിയനെ ജി20യിൽ സ്ഥിരാംഗമാക്കിയത് ഇന്ത്യയുടെ കഴിഞ്ഞ ജി20 അധ്യക്ഷതയുടെ നേട്ടമായിരുന്നു. ഇപ്പോൾ ആഫ്രിക്കൻ മണ്ണിൽ നടക്കുന്ന ഉച്ചകോടി ആ നേട്ടത്തിന്റെ തുടർച്ചയായി ഇന്ത്യ കാണുന്നു. ഗ്ലോബൽ സൗത്തിന്റെ വികസന ആവശ്യങ്ങൾക്ക് മുൻഗണന നൽകണമെന്ന ഇന്ത്യയുടെ നിലപാടിന് ശക്തമായ പിന്തുണ ലഭിക്കുമെന്നാണ് കേന്ദ്രസർക്കാർ പ്രതീക്ഷിക്കുന്നത്.
