തൃശൂർ: തദ്ദേശ തിരഞ്ഞെടുപ്പിൽ ശബരിമല സ്വർണക്കടത്ത്, രാഹുൽ മാങ്കൂട്ടത്തിലിന്റെ ഗർഭഛിദ്ര കേസ് തുടങ്ങിയ വിവാദങ്ങൾ ചർച്ചയാക്കേണ്ടെന്നും വികസനം മാത്രമേ വിഷയമാക്കാവൂ എന്നും കേന്ദ്രമന്ത്രിയും തൃശൂർ എംപിയുമായ സുരേഷ് ഗോപി. ബിജെപി കൺവെൻഷനിൽ സംസാരിക്കുകയായിരുന്നു അദ്ദേഹം. ‘‘സ്വർണവും ഗർഭവും ഒന്നുമല്ല നമ്മുടെ വിഷയം. ചെമ്പ് വിവാദം കൊണ്ടുവന്നിട്ടെന്തായി? ഞാൻ അതിനെക്കുറിച്ച് ഒരക്ഷരം മിണ്ടിയോ? കുടുംബത്തിന്റെ നേർച്ചയായിരുന്നു അത്. ആരുടെയെങ്കിലും കയ്യിൽനിന്ന് പിരിവെടുത്തതാണോ?’’ എന്ന് സുരേഷ് ഗോപി ചോദിച്ചു.
ലോക്സഭാ തിരഞ്ഞെടുപ്പിൽ എതിർ സ്ഥാനാർഥിയുടെ പേര് പോലും പരാമർശിക്കാതെ, വികസനം മാത്രം മുന്നിൽ വെച്ചാണ് താൻ ജയിച്ചതെന്ന് അദ്ദേഹം ഓർമിപ്പിച്ചു. സിപിഎം, സിപിഐ, കോൺഗ്രസ് വോട്ടുകൾ വരെ ബിജെപിക്ക് ലഭിച്ചു. ‘‘കെ. മുരളീധരൻ എന്നോട് മോശമായി പറഞ്ഞപ്പോഴും ‘മുരളിച്ചേട്ടനല്ലേ’ എന്നാണ് ഞാൻ പറഞ്ഞത്. ഇപ്പോഴും ആ കാലാവസ്ഥ നിലനിൽക്കുന്നു’’ എന്ന് സുരേഷ് ഗോപി വ്യക്തമാക്കി.
വികസന ഫോക്കസ് ഒരിക്കലും വിടില്ലെന്നും ജനങ്ങൾക്ക് വേണ്ടത് വികസന വിഷയങ്ങൾ മാത്രമാണെന്നും അദ്ദേഹം ആവർത്തിച്ചു. ‘‘സ്വർണ-ഗർഭ കേസുകൾ ചർച്ച ചെയ്യാൻ ഞാനില്ല. വികസനം മുന്നോട്ടുവെച്ച് വോട്ട് തേടണം’’ എന്ന് സുരേഷ് ഗോപി ആവശ്യപ്പെട്ടു. തദ്ദേശ തിരഞ്ഞെടുപ്പിൽ ബിജെപി പ്രവർത്തകർക്കുള്ള വ്യക്തമായ സന്ദേശമാണ് കേന്ദ്രമന്ത്രിയുടെ ഈ പ്രസ്താവനയിലൂടെ നൽകിയിരിക്കുന്നത്.
