കണ്ണൂർ തളിപ്പറമ്പ് രാജരാജേശ്വര ക്ഷേത്രത്തിൽ നടൻ മമ്മൂട്ടിയുടെ പേരിൽ പൊന്നിൻകുടം വഴിപാട് നടത്തി. ഉത്രം നക്ഷത്രദിനത്തിൽ തിരുവനന്തപുരം സ്വദേശി എ. ജയകുമാറാണ് വഴിപാട് സമർപ്പിച്ചത്. മമ്മൂട്ടിയുടെ ആയുരാരോഗ്യ സൗഖ്യത്തിനു വേണ്ടിയുള്ളതാണ് ഈ വഴിപാടെന്ന് ജയകുമാർ അറിയിച്ചു. ക്ഷേത്രം ഭാരവാഹികൾ ജയകുമാറിന് രാജരാജേശ്വരന്റെ ഫോട്ടോ നൽകി ആദരിച്ചു സ്വീകരിച്ചു.
ചികിത്സ പൂർത്തിയാക്കി എട്ടു മാസങ്ങൾക്കു ശേഷം മമ്മൂട്ടി ഇന്ന് കൊച്ചിയിലെത്തി. നെടുമ്പാശേരി വിമാനത്താവളത്തിൽ മന്ത്രി പി. രാജീവും അൻവർ സാദത്ത് എംഎൽഎയും ചേർന്ന് താരത്തെ സ്വീകരിച്ചു. പ്രിയ താരത്തെ കാണാൻ നിരവധി ആരാധകരും എത്തിച്ചേർന്നു. ഭാര്യ സുൽഫത്തും നിർമാതാവ് ആന്റോ ജോസഫും മമ്മൂട്ടിക്കൊപ്പമുണ്ടായിരുന്നു.
ഏതാനും മാസങ്ങൾക്കു മുമ്പ് കേന്ദ്ര ആഭ്യന്തര മന്ത്രി അമിത് ഷായും ഇതേ ക്ഷേത്രത്തിൽ പൊന്നിൻകുടം വഴിപാട് നടത്തിയിരുന്നു. പ്രമുഖ വ്യക്തികൾ ഇവിടെ എത്തി പൊന്നിൻകുടം സമർപ്പിക്കുന്നത് പതിവാണെന്ന് ക്ഷേത്ര ഭാരവാഹികൾ പറഞ്ഞു.
