തിരുവനന്തപുരം: സംസ്ഥാനത്ത് അടുത്ത അഞ്ച് ദിവസം ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. ജൂലൈ രണ്ട് മുതല് അഞ്ച് വരെ ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടാവുമെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. ജൂലൈ ഒന്ന് മുതല് മൂന്ന് വരെ കേരളത്തിന് മുകളില് മണിക്കൂറില് പരമാവധി 40 മുതല് 50 കിലോമീറ്റര് വരെ വേഗതയില് കാറ്റ് ശക്തമാകാനും സാധ്യതയുണ്ട്. ജാര്ഖണ്ഡിന് മുകളിലായി ന്യൂനമര്ദ്ദം സ്ഥിതി ചെയ്യുന്നതാണ് സംസ്ഥാനത്ത് മഴയ്ക്ക് കാരണം.
സംസ്ഥാനത്ത് മഴ സാധ്യത കണക്കിലെടുത്ത് വിവിധ ദിവസങ്ങളിൽ യെല്ലോ അലേർട്ട് പ്രഖ്യാപിച്ചു. കോഴിക്കോട്, കണ്ണൂര്, കാസര്ഗോഡ് ജില്ലകളില് നാളെയും കണ്ണൂര്, കാസര്ഗോഡ് ജില്ലകളില് ജൂലൈ മൂന്നിനും എറണാകുളം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് ജൂലൈ നാലിനും കണ്ണൂര്, കാസറഗോഡ് ജൂലൈ അഞ്ചിനും യെല്ലോ അലേര്ട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്.
