വാഷിങ്ടൺ: ഇന്ത്യയേയും പ്രധാനമന്ത്രി നരേന്ദ്ര മോദിയേയും യു എസ് പ്രസിഡന്റ് ഡോണൾഡ് ട്രംപ് പ്രശംസിക്കുന്ന അപ്രതീക്ഷിത പോസ്റ്റ് പങ്കുവെച്ച് ഇന്ത്യയിലെ യുഎസ് എംബസി. “ഇന്ത്യ ലോകത്തിലെ ഏറ്റവും പുരാതന നാഗരികതകളിൽ ഒന്നിന്റെ ആസ്ഥാനമാണ്. ഇന്ത്യ ഒരു അതിശയകരമായ രാജ്യവും ഇൻഡോ-പസഫിക് മേഖലയിലെ അമേരിക്കയുടെ പ്രധാന തന്ത്രപരമായ പങ്കാളിയുമാണ്. പ്രധാനമന്ത്രി മോദി ഞങ്ങൾക്ക് ഒരു മികച്ച സുഹൃത്താണ്” എന്നാണ് ട്രംപിനെ ഉദ്ധരിച്ച് എംബസി എക്സ് പ്ലാറ്റ്ഫോമിൽ പോസ്റ്റ് ചെയ്തത്.
കഴിഞ്ഞയാഴ്ച പ്രധാനമന്ത്രി നരേന്ദ്ര മോദിയും ട്രംപും തമ്മിൽ നടന്ന ഫോൺ സംഭാഷണത്തിന് പിന്നാലെയാണ് ഈ പോസ്റ്റ്. ഉഭയകക്ഷി ബന്ധങ്ങളിലെ പുരോഗതി വിലയിരുത്തുകയും വ്യാപാരം, പ്രതിരോധം, സാങ്കേതികവിദ്യ തുടങ്ങിയ മേഖലകളിൽ സഹകരണം ശക്തിപ്പെടുത്തുകയും ചെയ്ത സംഭാഷണമായിരുന്നു അത്. മോദി തന്നെ ഇത് “ഊഷ്മളവും മികച്ചതുമായ” സംഭാഷണമെന്ന് വിശേഷിപ്പിച്ചിരുന്നു.
വ്യാപാര തർക്കങ്ങൾക്കിടയിലും ഇരുരാജ്യങ്ങളും ഒരു കരാറിലേക്ക് അടുക്കുന്ന സൂചനകളുണ്ട്. യുഎസ് ഡെപ്യൂട്ടി ട്രേഡ് പ്രതിനിധി റിക്ക് സ്വിറ്റ്സറിന്റെ ഇന്ത്യാ സന്ദർശനവും ഇതിനോടനുബന്ധിച്ച് നടന്നു. വാണിജ്യ സെക്രട്ടറി രാജേഷ് അഗർവാൾ ഉൾപ്പെടെയുള്ള ഉദ്യോഗസ്ഥരുമായി ചർച്ചകൾ നടത്തിയ അദ്ദേഹം തിരിച്ചുപോയി.
ഈ പോസ്റ്റ് ഇന്ത്യ-യുഎസ് ബന്ധങ്ങൾ കൂടുതൽ ശക്തമാക്കുന്നതിനുള്ള സൂചനയായി വിലയിരുത്തപ്പെടുന്നു. ലോക സമാധാനം, സ്ഥിരത, സമൃദ്ധി എന്നിവയ്ക്കായി ഇരുരാജ്യങ്ങളും ഒരുമിച്ച് പ്രവർത്തിക്കുമെന്ന് ഇരുപക്ഷത്തുനിന്നും ആവർത്തിച്ച് പറയുന്നുണ്ട്.
