ന്യൂഡല്ഹി : പഹല്ഗാം ഭീകരാക്രമണത്തോടെ ഇന്ത്യ – പാകിസ്ഥാന് സംഘര്ഷ സാധ്യത ഏറ്റവും ഉയര്ന്നു നില്ക്കുന്നതിനാല് രാജ്യമാകെ ജാഗ്രതയില്. പാക്കിസ്ഥാന് തിരിച്ചടി നല്കാനൊരുങ്ങുന്ന പശ്ചാത്തലത്തില് കേന്ദ്ര സര്ക്കാര് വിവിധ സ്ഥാനങ്ങള്ക്ക് മുന്നറിയിപ്പ് നല്കി. വ്യോമാക്രമണ മുന്നറിയിപ്പ് സൈറണുകള് സ്ഥാപിക്കാനാണ് പ്രധാന നിര്ദ്ദേശം. എന്തെങ്കിലും തരത്തിലുള്ള അടിയന്തിര സാഹചര്യങ്ങള് ഉണ്ടായാല് അപ്പോള് സ്വീകരിക്കേണ്ട നടപടികളെക്കുറിച്ച് പരിശീലനം നല്കാനും ആവശ്യപ്പെട്ടിട്ടുണ്ട്.
അടിയന്തിര സാഹചര്യങ്ങള് നേരിടാന് പൊതുജനങ്ങള്ക്ക് പരിശീലനം നല്കാനും സംസ്ഥാനങ്ങളില് മോക് ഡ്രില്ലുകള് നടത്താനും ആഭ്യന്തര മന്ത്രാലയം നിര്ദ്ദേശം നല്കി. ആക്രമണമുണ്ടാകുന്ന പക്ഷം സ്വയരക്ഷ ഉറപ്പുവരുത്താനായി പൊതുജനങ്ങളും വിദ്യാര്ത്ഥികളും ഉള്പ്പെടെ സ്വീകരിക്കേണ്ട നടപടികളെക്കുറിച്ച് അവര്ക്ക് പരിശീലനം നല്കണമെന്നും പ്രത്യേക നിര്ദേശമുണ്ട്. മേയ് ഏഴാം തീയ്യതി വിവിധ സംസ്ഥാനങ്ങളില് മോക് ഡ്രില്ലുകള് നടത്താനും നിര്ദ്ദേശമുണ്ട്.
സംസ്ഥാനങ്ങള് പ്രധാന കെട്ടിടങ്ങളുടെയും പ്ലാന്റുകളുടെയും സംരക്ഷണത്തിനായി സ്വീകരിക്കേണ്ട നടപടികളും തയ്യാറാക്കണം. കൂടാതെ, അടിയന്തിര സാഹചര്യങ്ങളില് ആളുകളെ ഒഴിപ്പിക്കാനുള്ള പദ്ധതികള് സംസ്ഥാന തലത്തില് നവീകരിക്കുകയും അതിന്മേല് പൊതുജനങ്ങള്ക്ക് പ്രായോഗിക പരിശീലനം ഉള്പ്പെടെ നല്കാനും നിര്ദ്ദേശമുണ്ട്.
