അമേരിക്കൻ വിസ മൂന്ന് ചോദ്യങ്ങൾക്ക് ശേഷം ഇന്ത്യൻ ടെക് പ്രൊഫഷണലിന് നിഷേധിച്ചു

ന്യൂഡൽഹി: വർഷത്തിൽ ഏകദേശം ഒരു കോടി രൂപ വരുമാനമുള്ള ഇന്ത്യൻ ടെക് പ്രൊഫഷണലിന് അമേരിക്കൻ ബിസിനസ് വിസ നിഷേധിച്ചതായി റിപ്പോർട്ടുകൾ. വെറും ഒരു മിനിറ്റിനുള്ളിൽ, മൂന്ന് ചോദ്യങ്ങൾക്കുശേഷമാണ് യുഎസ് എംബസിയിൽ വിസ അപേക്ഷ തള്ളി. ക്ലൗഡ് നെറ്റീവ് ടെക്നോളജികളിൽ പ്രവർത്തിക്കുന്ന സീനിയർ ടെക് ആയ ഇയാൾ തന്റെ അനുഭവം Reddit-ൽ പങ്കുവെച്ചതോടെ ഇത് ടെക് സമൂഹത്തിൽ ഇത് വ്യാപകമായ ചർച്ചയായി.

ഇന്ന് ഡൽഹിയിലെ യുഎസ് എംബസിയിൽ എന്റെ B1/B2 വിസ ഇന്റർവ്യൂ ഉണ്ടായിരുന്നു. മൂന്നു ചോദ്യങ്ങൾക്കുള്ളിൽ വിസ നിരസിച്ചു. എന്താണ് പിഴച്ചതെന്നറിയാൻ ശ്രമിക്കുകയാണെന്ന് അദ്ദേഹം റെഡ്ഡിറ്റിൽ കുറിച്ചു. വിസ ഓഫീസർ അദ്ദേഹത്തോട് യാത്രയുടെ ഉദ്ദേശ്യം, മുൻ രാജ്യാന്തര യാത്രകൾ, അമേരിക്കയിൽ കുടുംബം അല്ലെങ്കിൽ സുഹൃത്തുക്കൾ ഉണ്ടോ എന്നീ ചോദ്യങ്ങളാണ് ചോദിച്ചത്.

അമേരിക്കയിലെ ജോർജിയ സംസ്ഥാനത്തിലെ അറ്റ്ലാന്റയിൽ നടക്കുന്ന KubeCon + CloudNativeCon 2025 എന്ന ടെക് കോൺഫറൻസിൽ പങ്കെടുക്കാനാണ് പോകാൻ ആഗ്രഹിച്ചത്. ഈ മേഖലയിലെ പുതിയ ട്രെൻഡുകൾ മനസ്സിലാക്കാൻ അത്യന്തം പ്രാധാന്യമുള്ള ഇവന്റാണ് അതെന്ന് അദ്ദേഹം വ്യക്തമാക്കി.

ചോദ്യങ്ങളുടെ മറുപടിയായി ലിത്വാനിയ, മാലിദ്വീപ്, ഇൻഡോനേഷ്യ തുടങ്ങിയ രാജ്യങ്ങളിൽ മുമ്പ് യാത്ര ചെയ്തിട്ടുണ്ട്. യുഎസിൽ ബന്ധുക്കളോ സുഹൃത്തുക്കളോ ഇല്ലെന്ന് പറഞ്ഞുവെന്നും അദ്ദേഹം വ്യക്തമാക്കി. തുടർന്ന് ഉദ്യോഗസ്ഥൻ Section 214(b) പ്രകാരമുള്ള വിസ നോട്ടീസ് നൽകുകയായിരുന്നു. തന്റെ സ്ഥിരമായ ജോലി, വരുമാനം, കുടുംബബന്ധങ്ങൾ എന്നിവ കണക്കിലെടുത്ത് വിസ നിഷേധിച്ചതിൽ അദ്ദേഹം അതിശയിച്ചു.

കഴിഞ്ഞ 11 വർഷമായി ഞാൻ ഇന്ത്യയിൽ സ്ഥിരമായി ജോലി ചെയ്യുകയാണ്. വാർഷിക വരുമാനം ഏകദേശം 1 കോടി രൂപയാണ്. എനിക്ക് എട്ട് മാസം പ്രായമുള്ള കുഞ്ഞുണ്ട്. അതുകൊണ്ട് തന്നെ തിരികെ വരാനുള്ള ഉറപ്പ് ഉണ്ടായിരുന്നുവെന്ന് അദ്ദേഹം പറഞ്ഞു. അറ്റ്ലാന്റ കോൺഫറൻസിനായി അദ്ദേഹം യാത്രാ പദ്ധതിയും ഹോട്ടൽ ബുക്കിംഗും തയ്യാറാക്കിയിരുന്നതായും പറഞ്ഞു. ഇവന്റ് ലൈവ് സ്ട്രീമിംഗായി ലഭ്യമല്ലാത്തതിനാൽ നേരിട്ട് പങ്കെടുക്കാൻ തീരുമാനിച്ചതെന്നും അദ്ദേഹം കൂട്ടിച്ചേർത്തു.

യുഎസ് ഇമിഗ്രേഷൻ ആൻഡ് നാഷണാലിറ്റി ആക്ടിലെ Section 214(b) അനുസരിച്ച്, അപേക്ഷകൻ അമേരിക്ക സന്ദർശിച്ചതിന് ശേഷം സ്വന്തം രാജ്യത്തിലേക്ക് മടങ്ങുമെന്നുറപ്പാക്കാൻ കഴിയാത്ത പക്ഷം വിസ നിരസിക്കാം. ഉദ്യോഗസ്ഥന് അപേക്ഷകന്റെ ഉദ്ദേശ്യത്തിൽ സംശയം തോന്നിയാൽ അല്ലെങ്കിൽ നാടുമായി ബന്ധം ദുർബലമാണെന്ന് തോന്നിയാൽ വിസ നിരസിക്കാമെന്നാണ് യുഎസ് സ്റ്റേറ്റ് ഡിപ്പാർട്ട്മെന്റ് പറയുന്നത്.

Indian tech professional denied US visa after three questions