ന്യൂഡല്‍ഹി: ഇസ്രയേലിന്റെ കരുത്തുറ്റ ആകാശ പ്രതിരോധ സംവിധാനത്തെ സാക്ഷാല്‍ ട്രംപുപോലും പുകഴ്ത്തിയിട്ടുണ്ട്. എന്നാല്‍, തകര്‍ക്കാനാവാത്ത ഉരുക്കുകോട്ടയെന്ന് വിശേഷിപ്പിക്കുന്ന ഈ വ്യോമപ്രതിരോധ സംവിധാനങ്ങളെ മറികടന്ന് ഇറാന്റെ ബാലിസ്റ്റിക് മിസൈലുകള്‍ ഹൈഫയും ടെല്‍ അവീവും ഉള്‍പ്പെടെ ഇസ്രയേലിലെ നിര്‍ണായക സ്ഥാനങ്ങളില്‍ എത്തിയത് എങ്ങനെ ?
ഇസ്രയേലിന്റെ വ്യോമപ്രതിരോധ സംവിധാനങ്ങളെ തെറ്റിദ്ധരിപ്പിച്ചു ‘തമ്മിലടിപ്പിച്ച്’ ലക്ഷ്യം ഭേദിക്കുന്ന പുതിയ തന്ത്രം പരീക്ഷിച്ചാണ് ഇത് സാധ്യമായതെന്ന് ഇറാന് പറയുന്നു. അയേണ്‍ ഡോം പ്രതിരോധ സംവിധാനത്തിലെ മിസൈലുകള്‍ ഇസ്രയേലിന്റെതന്നെ നെവാതിം വ്യോമതാവളത്തില്‍ പതിക്കുന്നതായി അവകാശപ്പെടുന്ന വിഡിയോ തുര്‍ക്കിയിലെ മാധ്യമങ്ങള്‍ പുറത്തുവിടുകയും ചെയ്തു. യമനിലെ ഹൂതി വിഭാഗം തൊടുത്ത മിസൈലും ഇസ്രയേല്‍ പ്രതിരോധം മറികടന്നതായി റിപ്പോര്‍ട്ടുണ്ട്.
ഇസ്രായേലിന്റെ ബഹുതല പ്രതിരോധ സംവിധാനങ്ങള്‍ പരസ്പരം ലക്ഷ്യം വയ്ക്കാന്‍ കാരണമായ ഒരു നൂതന ആക്രമണ രീതിയാണ് ഇറാന് പരീക്ഷിച്ചത്. അമേരിക്കയുടെയും പാശ്ചാത്യ ശക്തികളുടെയും സമഗ്രമായ പിന്തുണയും ഏറ്റവും കാലികവും ഏറ്റവും പുതിയതുമായ പ്രതിരോധ സാങ്കേതികവിദ്യയും ഉണ്ടായിരുന്നിട്ടും, ഇറാന് അതിനെ തകര്‍ക്കാനായത് ആക്രമണം പുതിയതലത്തിലേക്ക് എത്തിയതിന്റെ സൂചനകൂടിയാണ്. എന്തായാലും ഈ വിഷയത്തില്‍ ഇസ്രയേല്‍ ഇതുവരെ പ്രതികരിച്ചിട്ടില്ല.
ഇസ്രായേലിന്റെ അയണ്‍ ഡോം
ഇസ്രായേലിന്റെ അത്യാധുനിക വ്യോമ പ്രതിരോധ സംവിധാനമാണ് അയണ്‍ ഡോം, പ്രധാനമായും ഹ്രസ്വ-ദൂര റോക്കറ്റുകള്‍, മോര്‍ട്ടാറുകള്‍, ഡ്രോണുകള്‍ എന്നിവ തടയാനും നശിപ്പിക്കാനും രൂപകല്‍പ്പന ചെയ്തിരിക്കുന്നു. അമേരിക്കന്‍ പിന്തുണയോടെ റാഫേല്‍ അഡ്വാന്‍സ്ഡ് ഡിഫന്‍സ് സിസ്റ്റംസ് വികസിപ്പിച്ചെടുത്ത ഈ പ്രതിരോധ കവചം 2011 ല്‍ പ്രവര്‍ത്തനക്ഷമമായി. ഈ ആകാശ പ്രതിരോധക്കോട്ട വളരെ ഫലപ്രദമാണെന്ന് തെളിയിക്കപ്പെട്ടിട്ടുണ്ട്. ഇസ്രായേലി സൈനിക ഉദ്യോഗസ്ഥര്‍ 80മുതല്‍ 90% വരെ വിജയ നിരക്ക് ഇതിന് നല്‍കിയിട്ടുണ്ട്.
വ്യോമമാര്‍ഗം എത്തുന്ന ഭീഷണികളെ നിര്‍വീര്യമാക്കുന്നതിന് റഡാര്‍-ഗൈഡഡ് മിസൈലുകള്‍ വിക്ഷേപിക്കുന്ന ട്രക്ക്-മൗണ്ടഡ് യൂണിറ്റുകള്‍ ഈ സിസ്റ്റത്തില്‍ ഉപയോഗിക്കുന്നു. ഈ പ്രതിരോധ സംവിധാനത്തിന്റെ ശ്രദ്ധേയമായ സവിശേഷതകളിലൊന്ന് അതിന്റെ ‘ബുദ്ധിപരമായ’ ഭീഷണി വിലയിരുത്തല്‍ കഴിവാണ്. ഒരു റോക്കറ്റ് ജനവാസമുള്ള പ്രദേശത്തേക്ക് പോകുന്നുണ്ടോ എന്ന് ഇതിന് നിര്‍ണ്ണയിക്കാന്‍ കഴിയും. യഥാര്‍ത്ഥ ഭീഷണി ഉയര്‍ത്തുന്നവയെ മാത്രമേ ഈ സംവിധാനം തടയുകയുള്ളൂ.
