ടെഹ്റാൻ: ഇസ്രയേലുമായുള്ള 12 ദിവസം നീണ്ടുനിന്ന യുദ്ധത്തിന് ശേഷം ഇതാദ്യമായി പൊതുവേദിയിലെത്തി ഇറാൻ പരമോന്നത നേതാവ് ആയത്തുള്ള അലി ഖമനയി. ടെഹ്റാനിലെ ഇമാം ഖമനയി മോസ്കിൽ മുഹറത്തിന് മുന്നോടിയായി നടന്ന ചടങ്ങിലാണ് പരമോന്നത നേതാവ് പങ്കെടുത്തത്. പരമ്പരാഗത കറുത്ത വസ്ത്രം ധരിച്ചാണ് ഖമനയി എത്തിയത്. പരിപാടിക്കെത്തിയ ആൾക്കൂട്ടത്തെ ഖമനയി അഭിസംബോധന ചെയ്യുന്നത് വിഡിയോയിൽ കാണാം.
മോസ്കിന് മുന്നിൽ ഒഴുകിയെത്തിയ ഇറാൻ ജനത ‘സിംഹം, സിംഹം’ എന്ന് ആർത്തുവിളിച്ചാണ് അദ്ദേഹത്തെ വരവേറ്റത്. ‘ഈ സിരകളിലൊഴുകുന്ന രക്തം, അത് ഞങ്ങളുടെ നേതാവിനുള്ളതാണ്’ എന്ന് ജനക്കൂട്ടം മുഷ്ടിചുരുട്ടി ഉറക്കെ വിളിച്ചുപറയുന്നതിന്റെ വിഡിയോ സമൂഹമാധ്യമങ്ങളിൽ പ്രചരിക്കുന്നുണ്ട്. യുദ്ധം ആരംഭിച്ചതോടെ സുരക്ഷിത താവളത്തിലേക്ക് മാറിയ ഖമനയി വീഡിയോ സന്ദേശങ്ങളിലൂടെയാണ് ജനങ്ങളെ അഭിസംബോധന ചെയ്തിരുന്നത്.
