ഐഎസ്ആര്‍ഒയുടെയും നാസയുടെയും ആദ്യ സംയുക്ത ഉപഗ്രഹമായ നിസാറിന്‍റെ (NISAR) വിക്ഷേപണ തീയതി പ്രഖ്യാപിച്ചു. റഡാർ ഇമേജിങ് സ്റ്റാറ്റലൈറ്റായ ‘നിസാർ’ 2025 ജൂലൈ 30-ന് വിക്ഷേപിക്കും. ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്ന് വൈകുന്നേരം 5:40 നാണ് വിക്ഷേപണം നടത്തുക. നിസാർ ഉപഗ്രഹത്തെ 743 കിലോമീറ്റർ അകലെ 98.40 ചരിവുള്ള സൂര്യ-സിൻക്രണസ് ഭ്രമണപഥത്തിലേക്ക് (എസ്‌എസ്‌ഒ) ഐഎസ്ആർഒയുടെ വിക്ഷേപണ വാഹനം കടത്തിവിടും.
2,392 കിലോഗ്രാം ഭാരമുള്ള നിസാർ ഒരു സവിശേഷ ഭൗമ നിരീക്ഷണ ഉപഗ്രഹമാണ്. നാസയുടെ എൽ-ബാൻഡും ഐഎസ്ആർഒയുടെ എസ്-ബാൻഡും ഉൾപ്പെടുന്ന ഡ്യുവൽ-ഫ്രീക്വൻസി സിന്തറ്റിക് അപ്പർച്ചർ റഡാർ ഉപയോഗിച്ച് ഭൂമിയെ നിരീക്ഷിക്കുന്ന ആദ്യത്തെ ഉപഗ്രഹമാണിത്. 242 കിലോമീറ്റർ വ്യാപ്‌തിയും ഉയർന്ന സ്പേഷ്യൽ റെസല്യൂഷനും ഉപയോഗിച്ച് ഭൂമിയെ നിരീക്ഷിക്കുന്ന സാങ്കേതിക വിദ്യ ഉപയോഗിക്കുന്നതിനാൽ ഭൂമിയുടെ ഉപരിതലത്തിലെ മാറ്റങ്ങൾ പ്രത്യേകിച്ച് ഭൂമിയുടെ രൂപഭേദം, മഞ്ഞുപാളികളുടെ ചലനം, സസ്യജാലങ്ങളുടെ ചലനാത്മകത എന്നിവ നിരീക്ഷിക്കാൻ സാധിക്കും. ചെറിയ ചലനങ്ങള്‍ പോലും നിസാറിന് സെൻ്റീമീറ്റർ അളവില്‍ അളക്കാന്‍ കഴിയുമെന്ന് നാസ പറയുന്നത്.
മുഴുവൻ ഭൂഗോളവും നിരീക്ഷിക്കാന്‍ കഴിയുന്ന ഉപഗ്രഹത്തിന് കാലാവസ്ഥ വ്യതിയാനങ്ങള്‍, പകലും രാത്രിയും തമ്മിലുള്ള വ്യത്യാസങ്ങള്‍ സംബന്ധിച്ച ഡാറ്റ 12 ദിവസത്തെ ഇടവേളയിൽ നൽകുന്നു. മേഘങ്ങൾ തടസമില്ലാതെ തന്നെ വിവിധ ആപ്ലിക്കേഷനുകൾ പ്രാപ്‌തമാക്കാന്‍ ഈ ഉപഗ്രഹത്തിന് കഴിയും. ഭൂമിയുടെ പുറംതോട്, ഭൂകമ്പങ്ങൾ, അഗ്നിപർവതങ്ങൾ, മണ്ണിടിച്ചിൽ തുടങ്ങിയ പ്രതിഭാസങ്ങളെ അറിയാനും നാശനഷ്‌ടങ്ങളുടെ കണക്ക് വിശദീകരിക്കാനുമുള്ള ഡാറ്റയും ലഭിക്കുമെന്നാണ് റിപ്പോർട്ടുകൾ.
